最近很多朋友在求票，皆因坊間有個撥款計劃，一千多個入圍的計劃中，最多人投票的頭三名就可以獲得撥款，將提議變成事實，上去「loveideas」的網站逛一逛，發現當中不少的計劃，都借運動過橋。
借運動過橋，運動迷倒應該十分受落，只不過當中大多運動計劃得票都並不高，可能就係欠了你一票吧。
由低票數的開始慢慢睇，先有一項叫「一人一對跑鞋」，名堂不俗，有點為第三世界赤腳兒童籌款feel，玩法是集合一班初學者，只要3個月內每周跑3日，每次半個鐘，就為之初級班畢業，可得700大元跑鞋一對；若果能在3個月內每周跑4日，每次跑10公里呢，就可在完成後獲得1,400蚊專業版跑鞋一對！概念其實不俗，尤其建議撥款差不多全數用來買鞋，一點教練費也不收，純屬有心人也，而呢條橋其實很適合各位家長參考，因為通常我哋係調轉做嘅，買對靚鞋畀你先，跟住先迫你跑，邊work㗎！
再來一個「小孩不笨籃球訓練班」，主打不再悲情的天水圍90後，借打波提高他們的責任感，咁啱又有另一個叫「足球小將訓練計劃」，照顧新界北區的貧窮家庭兒童。這種社區中心式的活動，都有點借運動解決社區問題的積極想法，若果我係那一區的青少年，我就好希望有冇撥款都唔該搞嚟玩吓啦，炎炎暑假真係悶死㗎，之不過啲名稱可唔可以有點新意，唔好成日抄電影或者漫畫啦！
講到名，有個真係唔錯，雖然同運動無關，名字係「戀愛大過先」，一聽就知係鼓勵同學仔求學期間學業為重，主題係老派啲但題目名食得靚，一講就會想唱「同學愛新鮮，戀愛大過天……」唱吓好嘞，唔好拖手呀。
以上提及的項目，排名都告急，大家可以趁今日最後一日投票去睇睇，而咁多項目中暫時排第1嘅竟然都係運動主題嘅，名叫「開心家長運動計劃」，呢個觀塘區嘅項目內容其實無特別，即係大人做運動啫，不過解說入面有句又唔錯喎──由家長做運動開始，然後感染其他家庭成員，一齊建立健康快樂的家庭！阿爸肯玩，阿仔唔會無動於衷啩，所以我成日覺得波波池，係好應該畀大人都入去碌埋一份嘅，啲阿媽唔好成日掛住傾是非啦。
文：keyman