思捷（330）品牌有幾唔掂唔需要多講，上年豪使180億嘅品牌重生計劃成效仲未見到，但華華早前去過歐洲一趟後發現，思捷為咗起死回生，將品牌以特許經營模式判出去，製造另類產品，包括我哋每日都用嘅廁所用品！
被對手拋離幾條街
華華早排去思捷德國總部，同好多當地居民交流過，有位女士話：「唔覺Esprit賣時裝，反而賣洗手間用品更多！」check吓Esprit國際版網頁，果然發現有賣廁所用品，除咗一般香味清新噴劑，仲有紙巾座、浴室扶手柄等等，睇見都O晒嘴。有分析員同華華解釋，思捷早期為咗吸金，不斷將品牌以不同經營模式的形式賣出去，搞到衍生咗好多以Esprit品牌為名嘅騎呢產品。
除咗德國，華華順路去埋巴黎同米蘭，點知一間Esprit舖都唔見，反而H&M同ZARA嘅分店就開到一街都係。睇嚟思捷已經俾對手拋離幾條街咁遠囉。