歐國盃完咗到倫敦奧運殺埋身，睇完比賽隨時凌晨兩三點，肚餓又唔想煮，點算？今次我哋就搵到少年食神Michael帶路，帶埋莊思敏一齊揸車周圍去食消夜！
記者：李鑒泉
攝影：周旭文、黃子偉
耀東街 肉汁扒麪配香滑奶茶
揸車搵食冇乜難度?!但凌晨三點鐘就算你想搵都未必有得食，唔通晚晚麥記、翠華？「如果專程揸車食呢啲，不如在家煮麪算了！」莊思敏（Jacquelin）鍾情消夜，但朋友都怕肥，近年已少食。但晚晚都消夜的少年食神林澄光Michael就話：「其實唔可以叫消夜，我平時五六點先瞓，應該叫LateDinner，想食時才WhatsApp朋友找同道中人。」揸車去消夜自然可以這裏去那裏去，但凌晨三點仲有咩好食呢？
「九龍同新界有唔少地踎檔，由太子北向北走，到荔枝角以至荃灣都有。」Michael帶我們來的，首站就是靠近石硤尾街市、開業逾30年的蘇記大牌檔。雖然只係坐街邊摺枱摺凳，但全日無論幾點都係坐無虛席，大家都為一杯香滑奶茶而來，奶茶用上逾十種茶葉、黑白淡奶，以傳統絲襪奶茶形式炮製，愛飲奶茶的Jacquelin喝到停唔到口，「茶味濃得來無乜苦澀味，而且夠晒香。」單是奶茶又怎能滿足？Michael還推介必食這裏的牛扒、雞翼，牛扒表面煎得香脆但仍能鎖住肉汁，單點或配公仔麪同樣惹味，Michael更誇說是「地上最強的公仔麪」！難怪他幫襯超過十年，「實在有太多Encore的理由。」
泊車貼士
耀東街有數間大牌檔及菜館，是的士司機聚腳地，兩邊錶位或會爆滿，可泊在巴域街或石硤尾街一帶路邊。
蘇記（27791182）
地址：石硤尾耀東街及南昌街交界
擺花街 肥瘦相間Kebab
快餐常餐食得多，但消夜食黎巴嫩菜就真係未試過。中環蘭桂坊一帶除酒吧林立讓人買醉外，旁邊的擺花街就有小食店Beyrouth，主打濃味中東菜，其Kebab更屬夜蒲人士至愛。「好多人飲完酒後想食濃味小食，所以小店午夜後最多人，更多時是十幾廿人一齊嚟食，打電話落單再揸車自取的也不少。」採用傳統中東烤肉方式，店主Joseph將羊肉一串肥一串瘦梅花間竹掛在鐵枝上加熱，肉味濃郁，配合中東薄餅、椰菜絲及番茄一同入口，份量剛剛好，連Jacquelin都話食多件唔怕肥！
泊車貼士
凌晨蘭桂坊一帶人多車多，擺花街路邊通常很早就泊滿名車，警察間中會趕車，穩陣的話可選擇雲咸街及奧卑利街錶位，但同樣要手快有手慢無。
BeyrouthCafe（28541872）
地址：中環擺花街39號中環大廈A地下
柴油偈Q7遊車河
食完消夜通常都遊埋車河先返歸，揀腳車都要有番咁上下份量先至唔失禮。今次這部AudiQ7TDI柴油車又如何？自稱粉絲的Michael出言力撐，「我自己有部4.2公升汽油版Q7做中港車，行咗差唔多廿幾萬公里，至今無乜問題。兩個版本駕駛感覺差唔多，指向同樣靈敏，但A柱太粗。」有42吋長腿的Jacquelin就話後座空間感唔錯，有天窗就更煞食，「不過後排兩個座位我一定會摺埋佢擺衫。」Q7採用三公升V6TDI引擎，可輸出245匹馬力，而強大的550Nm扭力更早於1,750轉釋放，配合八前速Tiptronic波箱及Quattro四驅，就算行花園道都得心應手，至於電索尾門、泊車鏡頭等都一應俱全，交足功課。
後記
凌晨三點想搵好嘢食不易，今次有食神帶路消夜，雖然唔係食甚麼貴價菜，但味道唔錯之餘，揸車幾個字就到。食消夜啫，最想梗係就腳快捷又好食！
AudiQ7TDI
引擎：2,967cc柴油V6渦輪增壓
馬力：245hp/3,800-4,400rpm
扭力：550Nm/1,750-2,750rpm
傳動：八前速Tiptronic，四輪驅動
售價：$862,000
查詢：23802233（合迪汽車）
