蘋機會：4.7吋無邊AQUOS芒　海底奇清

專家話魚缸越細越難養，今次仲挑戰4.7吋迷你缸？非也，呢個實情係SHARP招牌貨AQUOS手機SH-09D；近乎無邊框設計，加上720p日系靚芒，播海底片時儼如真實魚缸咁清咁靚！天時暑熱Set番個會郁嘅海洋Wallpaper，感覺都清凉啲。

記者：陳國輝
攝影：蔡家輝
Model：Jancy@Zmodel

拼GSIII　贏在更貼邊

SHARP特別幫呢款無邊框設計起咗個朵，叫「EdgetoEdge」，佢哋更喺官網度，大吹其他手機面積雖大，但屏幕似足地產霸權，「實用率」只得六成！其他機面位去晒鏡頭、Home掣度，而佢部SH-09D屏幕比例就高達七成。換句話說，即係屏幕可視空間闊落咗，眼睛咪更舒服囉！
不過有好處之餘亦有隱憂，例如機身下方踢走經常用嘅Home鍵，舊Android用戶未必適應，而且用唔慣亦會經常篤錯芒，影響操作流暢性，不過點講都係創新設計，值得支持嘅。我哋搵埋近期熱爆嘅GSIII作比較，發現SH-09D無邊框設計，雖然睇落優雅，但鬥闊度，始終GSIII大0.1吋而小勝。

■好明顯SH-09D邊框較幼，機身亦無GSIII咁闊。

■兩者厚度相若，GSIII只稍薄一點。

■無咗Home鍵，換來多色指示燈。

■側邊仍保留開關掣及音量掣。

同步出Case　白機唔怕悶

日系機靠顏色豐富，並以推出Crossover特別版深受Fans愛戴，就好似早幾日抵港嘅EVA限量版咁，最癲竟炒至萬六蚊，水貨亦於幾日間被Fans吞掉！不過，今次SH-09D卻出乎意料地低調，齋提供白色機，別無他選，值得慶幸係此機到貨之時，對應嘅彩色機殼一併推出，一口氣有齊五隻色外，更帶有拋光、磨砂或透明等唔同質料畀你揀，論物料質感及手工精緻度，賣二百幾蚊唔算貴，店舖仲跟機殼送保護貼，可謂底面都Protect到。