梁振英上任未夠10日，拉雜成軍的團隊，已經負面消息不斷，睇怕要完完整整過到7月都有難度。新政府月初埋班，大部份人選早透過傳媒放風曝光，最令人意外的，係搵四大會計師行安永前香港區主席孫德基空降審計署。有傳媒翻舊賬指，孫德基在安永期間發生雅佳醜聞，令佢誠信留下污點。有知情人士同我哋講，孫本人在雅佳案中不涉誠信和專業失德問題；之不過，咁樣唔表示佢適合同埋有能力領導審計署。
孫德基在安永任職逾30年，在2006年接替胡定旭，出任中國及香港區主席後，亦一度兼任安永遠東區主席及首席合夥人。在孫德基擔任主席期間，一直被雅佳官司困擾。
曾任安永 雅佳案被指失職
雅佳控股前身係善美環球，市值一度過300億元，業務遍佈過百個國家。在亞洲金融風暴，雅佳因過度擴張，搞到資不抵債，被債權人申請破產。雅佳破產極度矚目，當時係香港歷來最大單企業倒閉事件。清盤人後來發現有人曾經改動雅佳賬目，於是控告為公司核數的安永疏忽，未有盡責核數。
呢單官司拖拉至2009年，清盤人庭上指有安永員工改動過雅佳賬目，更加點名話包括孫德基等數名安永合夥人曾審閱雅佳賬目。當時有消息指出，孫主要負責後期確認，未有將所有文件翻查，故無察覺有問題。事件曝光後，有安永合夥人涉改動賬目被捕，安永即時與清盤人和解。
安永無向外講花咗幾多錢擺平事件，有報章引述消息人士講，安永賠償的和解金額達10億港元。我哋就聽聞足足要賠兩億美元，即係接近16億港紙，即使有保險，都只能幫補一小部份。
和解後不足一個月，安永突然宣佈，合夥人孫德基退任中國及香港區主席，隨即引起外界臆測佢因為雅佳案落馬。孫德基當時就解釋話，安永內部一早有改組安排，與雅佳醜聞並無關係，撞正敏感時刻公佈，純屬巧合。
據熟知雅佳事件的幾名知情人士講，孫德基冇直接參與雅佳的核數工作，並非該審計項目的負責人，要搵那個時期的安永領導層問責，都唔應該輪到佢。用雅佳事件就話孫德基有專業失德和誠信問題，唔係好講得過去。
未保護港夥伴利益 欠勇氣
不過，孫緊跟美國總部政策，令到美國總部輕易借雅佳官司，控制了盈利豐厚的安永香港區業務，確實令到好多安永本地合夥人不滿孫德基，認為此事反映咗孫面對美國總部，過於軟弱和聽話，未能想方設法保護香港夥伴利益，缺乏勇氣和領導魄力。
美國安然10多年前爆煲，拖垮了五大會計師行之一安達信。安達信一夜之間瓦解，剩番落嚟的四大，好怕他朝一日君體也相同，開始將傳統上各地區辦事處各自為政、財政相對獨立的聯合國形式，重整為統一領導的中央集權。雖然話有加強風險管理的考慮，為咗應付監管環境變化，但亦方便咗美國總部分享更多高增長地區的收益。雅佳事件賠償金額龐大，安永香港的儲備獨力難支，畀咗安永美國總部機會借「泵水」奪權。
好好先生 要頂住政治壓力
孫德基早在80年代北上做會計生意，同中方關係唔錯。佢淡出安永後，出任多個公職，包括今年4月替梁振英，出任城大校董會主席。在特首選舉期間，孫德基與其他四大骨幹組成鑽石名單A16參選選委，在會計界選委中舉足輕重。有講法話名單經過中聯辦協調。
唔少AO、公務員對梁振英以及他的班底有所保留，包括孫德基的任命。審計署於政府架構中地位獨立，有權到不同政府部門查數，踢爆政府部門種種推卸責任、官僚主義、浪費公帑之事。好似審計署早前踢爆地政總署把關不力，搞到新界官地被長時間非法佔用，又揭發直資學校賬目混亂，審計署在公眾的形象一向唔錯。
審計署署長人選曾經由審計署內部晉升，又或者政府前高官擔任，兩者都比較令公務員有信心，署長能保持政治中立，審計工作不會淪為權鬥工具。
但孫德基與梁振英的關係密切，難免有人憂慮審計署會成為梁振英政府東廠，專門用來整治部門。
知情人士話，孫德基一向係好好先生，與人為善，人際關係甚佳；處事也謹慎，能夠用人唯才，所以作為一家會計師行領導，孫還可以。但係審計署不同商業機構，萬一有人因為政治原因向審計署施壓，好好先生孫德基會唔會頂得住，堅持秉公處理，抑或一如當年迎合安永美國總部，輕易屈服，就係一大疑問。