上周李寧（2331）踢走CEO，隨即宣佈三階段變革藍圖，甚麼加強零售清存貨、改善供應鏈管理、提高銷售利潤結構，簡直bullshit到暈，內容空洞無新意。股榮睇完晒頭，與其做些虛無飄渺的事，不如實實在在做些有意義的事。以下醒三招畀李寧，夠guts的話，仲有機會翻身，否則一係等執、一係等被人收購。
第一招要夠Cheap。李老闆，請問你憑乜嘢，產品可以賣得咁貴？無錯，李寧係強國製造，NIKE同adidas都係MadeInChina，但人家有勒邦占士、杜蘭特、C朗拿度、美斯代言，比起你簽埋NBA二打六綠葉，足球更一位TopPlayer都冇，如果你係客仔，你會買NIKE占士800蚊籃球鞋，抑或李寧埃文特納700蚊人仔球鞋。強國人尤其鍾意面子，打波見你着住阿水鞋，仲要只係平一百，心理上絕對難受。
運動股隻隻話要清存貨，李寧只要狠心三折大平賣，加個買一送一，我相信快則半年已經沽清。往後不要扮高檔，產品要平過本土對手，專心做好中國市場，可能仍有契機。
應尋找明日之星代言
第二要改口號Slogan。無論係2010年前的everythingispossible抑或之後的makethechange，李寧口號都予人疑似抄襲及年老的感覺。一個成功的品牌，口號相當重要，正如上文所講，李寧本身有種年齡的烙印，隨住新一代成為高階消費群，李寧未能予他們所謂的共鳴感，這是強國品牌遠遠及不上外國的地方，或者這就是企業市值大細之分野。
大家不妨比較中外品牌口號，除安踏（2020）keepmoving還有年輕的感覺，其他例如多一度熱愛、非一般的感覺或Icanplay，完全沒有個性。李寧makethechange最差，予人年老要改變的直覺。大佬啊，我做運動都係想後生啲，點知未做就俾人話老餅，問你死未。
李寧目前面對最大的困境，是品牌已經被市場定了位，要突破必須建立新的分支品牌，這就要靠明星運動員開拓市場。尋找明日之星是李寧急切要做的，是長遠的戰略部署，比甚麼改善供應鏈來得實際。
中國無疑有很多優秀的運動員，但全部被外國兩大品牌壟斷，他們自細開始簽約贊助到成名，包括劉翔、李娜及姚明等。即使是林書豪未成名前，已被NIKE睇中贊助，由維基NIKE贊助名單中，甚至連香港足球隊成員都有份，你可以說他們是大包圍落注，但內地企業流行的即食文化，注定難以搶贏明星級運動員。
李寧昔日自創體操多個高難度動作而成名，今日李寧品牌所缺的，正是這種創新的意念，如要避免步Reebok及UMBRO被adidas及NIKE收購後塵，請李老闆大膽上馬，縱未能贏得掌聲，也不致抱憾離場。
股榮