「賺盡」呢個詞，近年每每見於描述香港某些幾成壟斷行業的大財團或所謂霸權，但家陣竟能同樣用喺啲官員身上，官商果然臭味相投。所以一旦有機會埋身，點會唔嚟個勾結擁抱先得㗎？梁這本已天殘地缺的班子上任還不到一星期，給人連連翻舊賬，只見斑斑劣迹。
接任升官的林鄭、成為發展局新局長的麥齊光，上星期就被本報揭發早年與一名職級相近的同僚，最終證實係現任路政署助理署長曾景文，互租對方在同一屋苑，咁啱仲係一層之隔嘅同座單位，再「蹺」嘅係所涉兩宗物業的買入日期，相距只不過係兩日，都未計佢兩個不過係喺買樓嗰陣又唔覺意撞到喎！
衣櫃密友定係人格有病
往後嘅劇情發展，睇怕都要搵埋「心戰」嘅編劇嚟先度掂。因為涉案嘅兩人，唔單止擁有對方同樣嘅置業喜好，甚至有啲時間佢哋直頭就似係調換身份。如果唔係，咁點樣解釋一個受過高等教育的能官幹吏，竟會輕易就全面授權個同事，亦都係佢嘅租客去負責其持有單位嘅買賣事宜，即係話個業主任由個租客決定住緊層樓應該幾時放盤，要賣幾多錢，仲要代收埋成交款項！兼且對方亦不約而同，依樣畫葫蘆照足咁做！如此隨便就將產權交託，現今世道就算係親如兄弟都未必會囉，除非兩位另有親密關係。不過據未有着落嘅嗰位葉劉所講，呢啲「取向」反而要喺「品格審查」嗰陣申報。其實，你寧信佢哋係「衣櫃密友」，定係同時患上人格方面心理病嘅患者，抑或不過就係彼此品格方面都出咗問題嘅同僚？
但多個公務員團體相繼表示：舊時嗰套一邊申領租金津貼，一邊將個人名下物業放租的做法，只要符合相關條件，並無不妥。當然利益相關，其身待正又豈會輕易拿起石頭去砸自己那幫既得者的腳。所以當年有代表性工會甚至提出特赦，以解一眾高官之圍。比諸僭建，此等行為更涉濫用公帑，最後只有不了了之，反而政府要另行推出公務員置業計劃以作替補，可知「租津」漏洞甚多，其牽連亦廣。
公僕搵着數 市民嬲到震
嚴格嚟講，我哋真係唔可以話呢班高官呃津貼，佢哋都只不過係識得走法律罅、鑽空子、利用規條的灰色地帶去謀取個人利益。所以麥局長仍振振有詞話，「我已按照公務員規矩做，唔覺得係涉及操守問題。」還要強調問心無愧，呢樣就確係無從深究，因為每個人對於個人品格嘅要求都好唔同。
正如「貪曾」都係話佢不過係衰唔知市民嘅標準變咗，所以先要道歉，但骨子裏從來都唔覺得自己有錯。再者如建制大派更加唔會直認該黨只知「禮義廉」！
所以商業機構若求「賺盡」，撇開社會道義，實無可厚非；惟見諸於自詡「廉潔自愛、情操更高」的公務員隊伍身上，市民卻有份被「水」，怎不教人義憤填膺。
盧先亞