時下香港盛吹韓風，之前英超班霸曼聯亦唔例外，因為陣中有南韓球星朴智星壓陣。不過，隨住朴智星逐漸踏入球員暮年，想當年嘅「星仔」轉眼間亦已變成「星爺」，加上新一代日本國寶香川真司嘅加盟，朴智星將會被領隊費格遜放棄，兼即將轉投昆士柏流浪。
31歲嘅朴智星，05年由燕豪芬以400萬鎊加盟紅魔；效力曼聯7年間，曾助紅魔鬼奪得4次英超，3次英聯盃以及1次歐聯冠軍；用不完嘅體力亦成為朴智星嘅象徵，從而得來「三肺星」嘅綽號。
08年歐聯決賽，曼聯喺莫斯科勝車路士一役，當年費爵爺手上實在有太多當打球員，包括基斯坦奴朗拿度、史高斯、卡域克同夏格維斯等，最終費格遜冇喺決賽派星仔上陣，最慘嘅係連後備都冇份。賽後費Sir亦覺得好對唔住星仔，之後都有同朴智星saysorry。
500萬鎊賣去QPR
當年嘅愛將，今時今日已被貶為後備；上季英超，朴智星只得10次正選上陣機會，加上年事已高，而且星爺喺明夏就會約滿，為免人財兩失，曼聯即將會以500萬鎊將朴智星賣畀昆士柏流浪，並簽署一份周薪60,000鎊嘅3年合約。況且香川真司嘅來投，無疑令朴智星更加冇碇企。雖然星爺話歡迎香川加盟，仲話：「香川係一位天才，肯定可以喺曼聯證明自己。雖然隊內競爭更加激烈，不過咁樣可以更加推動我提升自己。」
講係咁講，相信來季朴智星將會由紅色戰衣，換上藍白間波衫出戰英超。雖則曼聯唔要朴智星，但QPR就當正佢係寶。點解？因為QPR老細費南迪斯相信，朴智星可以幫佢哋開拓亞洲市場囉！而且，費迪南斯亦認為，以朴智星嘅經驗同埋技術，有助佢哋鞏固喺英超嘅位置，唔使好似上季咁，要打到最後一輪聯賽先保得住個英超席位。
另外，因膝傷而休息咗足足7個月嘅紅魔隊長尼曼查維迪，經已傷癒復操，可望喺新球季一開始，就替曼聯披甲。