一張齊心摺凳，還有「橙樣」，在在提醒大家現政府是梁營，而不是全民政府。
究竟係邊個放不低，心態上仲停留在被主流排擠的非主流派，認為傳媒不公，雙重標準，開口埋口酸味怨氣撲面。TVB專訪林鄭，佢在曾朝受力捧，從未表現出怨婦樣，但一到梁朝，竟然又怨咒纏身，怨傳媒專挑官員醜聞來報道，暗指佢哋譁眾取寵。
玩政治 欠缺判斷力
我一早已講過，呢種少數派上位心態要小心。由3月25日當選起計，梁營從未享受過勝利，仍然用Underdog姿態面對香港人。自己政治判斷失誤力推五司十四局，就埋怨立法會議員雙重標準，猛問點解曾蔭權改組就得，梁振英改組就唔得。喂！大佬，玩得政治，就要知道政治之本質係雙重標準，或多重標準。
三低當選，係人都知冇蜜月期，所謂黃金100日，係由3月25日起計，而並非由7月1日起計。候任政府全力搞重組，如果全力搞老人金，喺7.1之後立即呈交立法會財委會，你話邊一個泛民政黨敢拉布反對。
選舉前 政黨狂抽水
有實質政策在手先落區玩親民Show，傳媒自然冇反感，自己也站在道德高地，政黨要抽水也冇咁易。
冇實際政策在手，只有玩政客一手，落區抱BB，訪貧問苦，由舊年競選玩到今日，你唔厭，睇嘅也睇到超厭，而9月立法會選舉前，所有政黨都會抽乾水。
梁振英政治判斷力低，操作冇經驗，但自我感覺良好，唯一為自己解脫，就係諉過於人。未來五年梁營主政下，怨咒將不絕於耳。
添馬男