08至09年間，設計師陳禮善作了一個令他引以自豪的決定：「我叫員工放低工作，即刻去睇樓，先搞掂呢件人生大事，部份同事我甚至畀埋房津；遲咗，可能買唔番。」在那年頭買樓，成果美滿，「但我自己就麻麻哋，睇啱市，但總係揀冇得升的樓盤。」他笑說。
記者：葉淑貞
攝影：梁鑑章
設計行業與地產界合作無間，「邊區新盤收鎖匙，我哋要好清楚，又接觸很多地產人，見證有錢佬誕生！」陳禮善近水樓台，篤信「儲樓」是王道，「『儲樓』好似好大口氣，但聽前輩、生意人的心得，都是因多年來儲起物業，滾存巨大財富。」
感性先行 揀樓麻麻
這條上一輩致富方程式，他深信不疑，故踏足社會以來，一直買樓保值，「買股票仲衰，我哋成班朋友只買藍籌，跌到唔想再睇。」他自言買樓運氣不算好，「升得勁的都是大型屋苑，我做設計，以感性先行，只揀喜歡的間隔與環境，反而升得麻麻。」
陳禮善創業十餘年，「命令」員工買樓一役，是他業績以外的自豪，「作為領導人，都希望自己與員工利用公司的平台取得成功。金融海嘯時，大家為生意煩惱，但只要齊心、團結，難關好快過去，當時我就向經理級、高層員工說，趕快去買樓，結果個個都成功。其實當時應否買樓，都係靠估，但員工擁有自己物業，會更團結及安心工作。」
趨勢難料 不敢估頂
「樓市起跌的趨勢，很多人都估計到，估到但冇能力做，你唔使傷心，但估到、有能力而不做，你就要問自己是否想得太多。」識買也要識賣，但他不敢估頂，「中國有很多毋須按揭的買家，而且內地中產族群正在興起，所以樓市幾時回落，無人估到。但投資者有句話：『不要食完甜品才離場』，不要期望以最高價賣出，賣咗仲升，那不是你的錢。若果只得一層自住樓，我更不鼓勵賣。」
艷麗：設計風格 妖艷非常
陳禮善由外型、五官以至處世態度，都圓圓潤潤、平易近人，但其妖艷的室內設計風格卻很重口味。
選擇自住樓，他特別喜愛充滿大自然氣息的新界西北，不過室內仍是艷色無邊，看他住過的元朗朗晴居、加州花園，着實花多眼亂，「替自己設計最難，左度右度，總是不滿意，幫人設計會快手好多。」繼而轉到他持有的元朗翠峰，單位雖說是度假屋，實為他放置用不着傢俬的地方，白白淨如示範單位，皆因遇到好價都會賣，故未有替單位艷裝，不過，購入至今樓價只微升，「我唔會出租，擺埋一邊儲起佢。」
童話：另類角度 觸發靈感
陳禮善（Kevin）中五畢業後加入港鐵工作，並利用工餘時間進修設計課程，取得相關資歷後正式入行，現為設計公司「設計情報」總監兼老闆。
他的作品色澤鮮明，充滿豪華瑰麗的風格，閒時勤於涉獵不同範圍，激發創作靈感，畢竟賣創意的人，都會有「drydry哋」的時候，他教路：「若然覺得冇靈感，不妨從另一角度看事物，例如用踢波的觀念切入設計中，可能會有新發現。」
