幾年前落選嘅自由黨田北俊，休養生息幾年，今年重整旗鼓再出擊立法會選舉。噚日佢去到北區，同多個鄉事會主席茶敍，又同上水街坊飲下午茶。
田少已進入備戰狀態，最新消息係佢個老拍檔、自由黨周梁淑怡可能都會出山助佢一臂之力，再由幕後走到幕前，同田少組名單參選。周梁做過新西直選議員，落區拉票冇難度，有佢貼身照顧田少，相信勝數比較大。
政壇剩女獲中聯辦撮合
上屆選舉對田少做成好大威脅嘅「政壇剩女」龐愛蘭，喺中聯辦撮合下，終於「嫁」入公民力量，9月可打住公民力量支旗出選，對佢利多於弊。
事關盤據沙田多年嘅公民力量鐵票多，加上中聯辦配票「嫁妝」，龐愛蘭當選機會激增；可憐默默耕耘多年嘅公民力量元老何厚祥、韋國洪，就升呢無望喇。
凡事都有辣有唔辣，創立公民力量嘅民建聯副主席劉江華，極可能參選超級區議會議席，到時佢想動員公民力量樁腳幫拖，或者同龐愛蘭一齊宣傳，公民力量點會托手踭?據講龐愛蘭最驚就係呢樣，因為公民力量唔算係正式政黨，如果劉江華同佢一齊宣傳，等同倒米，佢苦心經營嘅隱形左派形象，即時現形。
劉江華話，如果龐愛蘭自己宣傳，佢不會過問，但如果公民力量幫兩個人宣傳，佢不能不現身。
正所謂上得床嚟掀被冚，龐愛蘭猶抱琵琶，係遮掩唔到保皇嘅事實，一件污、兩件穢，怕乜醜呢！
mailto:[email protected]