無綫喺今日會舉行《紅白鬥》，之前仲以為得番一班小星星撐場，後來經過多番努力，終於班到一群雷霆救兵，除咗一直撐住無綫嘅容祖兒，仲有許志安、梁漢文、甄妮、曹格、林子祥、關淑怡、草蜢同蕭敬騰等，仲有好耐冇喺無綫出現嘅謝安琪（Kay）。
噚日《紅白鬥》喺電視城拜神，紅組隊長容祖兒同司儀曾志偉一齊切燒豬，Kay都有出現。見到Kay現身，祖兒話要休息吓，佢話：「今日嘅主角梗係唔係我啦，你哋（指記者）快啲將焦點擺番喺謝安琪度啦，唔好搞我呀，我咁低調。」
隨即賣口乖
當年環球同無綫唔妥，Kay首當其衝，佢仲即時被封殺，噚日佢終於獲無綫特赦。Kay噚日重返無綫錄影廠，感觸良多，佢仲賣口乖話：「今日好開心獲TVB邀請參與《紅白鬥》，我會負責其中一部份，同閻奕格一齊唱歌。咁呢個騷真係好好睇，我都好期待去睇。仲有頭先入嚟，好開心，見到好多工作人員，大家擁抱影相，好溫情，佢哋仲搵我簽番幾年冇簽嘅碟。」
不過，講到同無綫簽歌手約，Kay就希望第日可以去不同平台宣傳同做騷。另外，Kay獲無綫放生參與《紅白鬥》，同場嘅張繼聰被問老婆嘅合約問題，佢話：「我都好想知，但涉及合約唔敢問。」