去年三月外婆過身，令G.E.M.首次面對死亡這個人生課題，使她改變了不少，她說：「從來冇同我咁親近嘅人離世，第一次有親人離開我，最初我覺得死係好可怕嘅事，我怕死，覺得死後會與世隔絕。朋友鬧交，甚至絕交，但你仍然有機會見到佢，但死咗從此唔會再接觸到，所以覺得好可怕。從來冇經歷過，就覺得呢樣嘢與我無關，儍得以為身邊人唔會離開我。」
由細湊到大
由外婆患病到離開人世，事情來得突然且快，G.E.M.說：「一月知道外婆病咗，醫生預計三月會走（逝世），當時好大打擊，因為我小時候由外婆湊大，關係親密。但當時好矛盾，我唔能夠畀佢覺得佢就快要走，我知道外婆一直好想喺上海嚟香港，睇我喺紅館開個唱，可惜我五月先開騷，好遺憾。最後演唱會時，外公同舅父嚟咗睇我演出，我都有留位置畀外婆。」
在外婆喪禮上，G.E.M.望着她的遺體有所領悟：「呢件事係好大嘅轉捩點，外婆喪禮現場播佢生前唱歌片段，我當時要瞻仰遺容，望住外婆遺體，我覺得跟本唔認識呢個人，身體到樣貌同我認識嘅外婆唔同，突然間覺得家人愛你照顧你，就算佢唔存在，仍然會守護自己，所以我唔再怕。到家我祈禱，有時順便會同外婆講嘢，覺得佢就喺我身邊。」