尹佩斯宣佈唔同阿仙奴續約，引發骨牌效應，搞到下年夏天約滿嘅禾確特亦唔想留喺兵工廠；而阿仙奴領隊雲格當然唔會坐以待斃，諗住補入羅拔利雲度夫斯基同埋祖維迪；但問題係，一個貴到冇朋友，另一個就係病壞。所以，我求大俠就對雲格嘅應變計劃好有保留囉！
明夏就同阿仙奴約滿嘅荷蘭射手尹佩斯，前日喺佢官網話決定唔續約；佢一咁講，聽聞禾仔即刻有樣學樣，就算阿仙奴開咗張4年新約畀佢，兼且將佢嘅周薪由55,000鎊加到80,000鎊（約96萬港元），佢都不為所動。
一個又係咁，兩個又係咁，阿仙奴唔想到時人財兩空，唯一可以做嘅，就係嗱嗱臨賣走佢哋兩個。咁有出自然有入，而且話晒尹佩斯同禾仔都係主力，雲格梗要搵人嚟頂佢哋啦！
垂青費倫前鋒祖維迪
聽講雲格已心裏有數，而呢兩個人就係波蘭前鋒羅拔利雲度夫斯基同埋黑山前鋒祖維迪。羅拔仔對上兩季幫多蒙特贏到聯賽錦標，喺德甲人氣爆燈，就連曼聯都想搵佢；多蒙特見有大會睇中羅拔仔，即刻將佢嘅身價定為3,000萬鎊。3,000萬鎊唔係少數目，阿仙奴出名孤寒，我求大俠真係唔係幾信佢哋會大嗱嗱用3,000萬鎊買一個球員。
至於祖維迪，呢個22歲嘅費倫天拿球員係就係好波，但弊在係腳患馬，好容易受傷；而喺10/11球案季，佢就因為膝傷而全季打柴。佢個record差成咁，如果我求大俠係雲格，一定唔會考慮佢，簽咗佢番嚟咪盞搞。
取消去尼日利亞熱身
好彩離新一季英超開鑼仲有成個月，雲格叫係仲有啲時間，我求大俠希望佢可以盡快搵到合適人選啦。此外，唔知係咪阿仙奴家陣笠笠亂，搞到去尼日利亞場季前熱身賽都取消。
另外，有博彩公司開出尹佩斯喺今夏轉會嘅賠率，其中過檔曼城最熱，得1.57倍；緊隨其後就係巴塞隆拿、祖雲達斯同埋曼聯，分別係5倍、5.5倍同埋7倍。咁又係，據聞曼城肯出2,000萬鎊同阿仙奴買，同畀尹佩斯22萬鎊周薪，真係好難唔成事囉！