七月一日在馬場廂房應酬完畢，返回自己座位後，碰到貿易B坐在附近，問佢：「贏錢未？」貿易B答：「冇呀，今日場場買輕磅馬，無甚斬獲。冷門『咁都得』又買唔到，只係中咗『感恩』，係熱門冇肉食呢。」何謂輕磅馬？貿易B話：「即係10-14號馬，通常孭磅在120磅以下，我以為打完風，落過雨，輕磅馬有着數，仲有一樣嘢，臨出門，我老婆話今屆政府冇乜重磅馬，多係輕量級人選，故此撞口卦，話輕磅馬當道，叫我入場買輕磅馬！」唉，又係咁都得？呢啲師奶賭馬法如果贏大錢，「蘋果馬經」駛乜搵埋咁多高手寫馬經呀，偶然撞彩就話得啫！
問貿易B：「B太話今屆政府多輕磅馬，可唔可以舉例說明之呀？」貿易B答：「梗係有啦，講行政會議召集人──鍾士元比林煥光重好多磅啦，劉皇發一定比張學明重磅啦，楊敏德啲國際視野與貿易眼光，唔，我同楊小姐係同行，與李慧琼邊度有得比呀，李小姐可能係羽量級㖭！梁先生既然係三低特首，內閣班子與行政會議成員又不足以抬高佢嘅聲望，加上新領袖新上台起碼有三至六個月蜜月期，但梁先生就一上台就俾人嗌下台，以後點搞呀？」
有得搞嘅，只要佢在房屋、扶貧、長者方面首先下工夫，大力派糖（因為民調顯示佢嘅支持者大多數係教育程度與收入較低嘅基層，且以年老者居多），趕緊興建大量居屋，提高生果金，咪可以買到支持囉，呢條係歐洲競選必殺技（至於後果如何，競選時邊會諗），梁生在港抄橋唔駛付版權稅。法國總統奧朗德上台後，佢嘅社會黨贏咗國會選舉，即刻話要提高最低工資，降低標準工時，便是一例。
貿易B同意此說法，不過佢又擔心民建聯/工聯會係梁生唯一支持者，對佢影響力太大，例如王國興話要回購港鐵，陳婉嫻話要回購領匯，如新政府聽從之，香港營商環境大受影響噃。貿易B話：「我既係港鐵領匯股東，我一定反對政府回購，除非出好高溢價，但我同時又係納稅人，如果出價太高，我一定反對，回購港鐵與領匯起碼動用千幾億元。大嗱嗱咁多錢，點解唔用嚟起居屋，興建更多醫院呀！」你同我定，如果梁振英聽從回購之言，抵佢施政寸步難行啦，佢唔會笨到咁啩？佢嘅內閣唔會輕磅成咁呀嗎！