我哋消費者，難免比較鍾意名牌，貪質素有保證。但光顧地產代理呢，又未必係咁。
早排去搵二手樓，行入某大行，代理仔話無乜盤，不如去睇新盤，我話唔啱Budget，而且現樓有貨睇，會放心少少。佢話好好好，於是隨意睇咗一個二手，跟住借啲意車我去睇某新盤，「你睇吓，計埋優惠呀二按呀，月供都係差唔多，梗係新盤好啦！」我忍住度氣喺示範單位行咗一圈，就借意走人，將條友列入黑名單。
後來同老手傾開，佢點醒我話新盤佣金高，又煩少好多嘢（例如同業主交涉講價、單位管理費諸如此類），仲要向發展商交數，梗係想你買新盤啦。我頂，假如我放盤，除非開筍價，否則咪唔使賣？
反觀好多細行無份做新盤，多數係做街坊生意，基本上會跟得貼啲，而且好多都係由大行跳出嚟開業，經驗有番咁上下，我仲遇過老實人直言單位邊度邊度漏水（我唔明佢點做生意，哈哈）。
行入細行收料、打好關係，以在下的觀察係絕對應該做的功課。但係細行根基無咁穩，遇着風高浪急，唔知會唔會有另類風險？
讀者飛哥
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。