小巨肺G.E.M.原來已出道四年，最為人知是與台灣歌手林宥嘉的戀情及其導彈身材。有見及此，G.E.M.受訪時不斷強調想把戀情低調處理：「有時同事努力做嘢，講戀情變成喧賓奪主。」但講起林宥嘉受她樂觀感染變得開朗，她不禁嘴角含笑，辯稱男友是「行家」。過往被揭在Xanga狂爆粗鬧胡杏兒，她坦承中一開始講話總要塞句粗口，但不認為講粗口一定是壞人。去年受洗後，她決定戒粗口，現在會將感受透過歌曲與人分享。 撰文：王連連
未入行前鄧紫棋（G.E.M.）愛寫blog分享感受，去年被揭發年輕時在blog用粗口狂數藝人。入行後加上信主，她學習戒掉粗口，轉而在歌曲抒發感受。七月推出新碟，把接近兩年人生的變化，心中感到的不如意、不快事，傷心化成創作來源，在錯誤中成長，透過負面的情緒令自己長大，演變成歌曲抒發。
還以為G.E.M.人生的轉變，一定包括被揭發與男友林宥嘉的戀情。當日二人拍拖，突然有狗仔隊偷影，男方反應極大，但G.E.M.卻覺得沒大不了：「由我入行開始，不時俾人偷影跟蹤，有啲習慣，其實嗰件事對我嚟講冇乜太大影響，當時我冇太驚慌，反而我會驚人哋以為我炒作新聞，有啲人會覺得係我叫記者嚟。」她相信香港樂迷會知道自己主力是做音樂，但其他地方的人只從報道中認識她，擔心被人覺得她總是把戀情掛在口邊，以此來宣傳。
專注工作避忌談情
G.E.M.謂一直想把戀情低調：「一直都想結婚先公開我嘅狀況，其他統統都唔想講，講出嚟如果有乜嘢事，記者問完我又會問男友，沒完沒了。有時公開咗真係唔方便，雖然一齊出街唔使避忌，但你工作上做過乜都會連埋身邊人嚟講。有時同事好努力幫我哋做嘢，講戀情變咗喧賓奪主，冇人再提我工作。」就算不多講，也避不開記者的提問，早前林宥嘉來港開個唱，她也逃不過被問會否去捧男友場。G.E.M.坦承：「我明知會有人問，所以索性唔去睇，我怕會喧賓奪主，人哋會覺得炒作，唔小心又會視線被模糊。一嚟為別人着想，同行專心開演唱會，唔想搞到其他人。而且都為自己着想，唔想俾人認為搞宣傳。」G.E.M.避開說林宥嘉的名字，只稱男友做「行家」，細心地不想男友的努力被抹煞。
高潮過後迷失方向
G.E.M.活潑的性格感染呆板的林宥嘉，令他變得開朗又主動，笑容也多了。G.E.M.嘴角含笑說：「唔知喎，其實我唱歌唔係想只係影響身邊一、兩個人。作為歌手我想分享自己嘅感受，想喜歡我、追蹤我嘅人，唔會浪費時間，所以能影響任何一個人，我都會覺得安慰。」而G.E.M.怎樣解說林宥嘉笑容多了，人逢喜事精神爽？她說：「笑係大家天生嘅本能，人每每適應到環境，就自然會放鬆心情。我唔知佢為乜嘢事，不如你問番佢。」
不提戀情只想大家的焦點落在工作上，G.E.M.在紅館首次舉行個唱，差不多大半年時間籌備，忙完後有段時間休息，反而令她不安，找不到方向，她說：「我同公司大部分人都係第一次做紅館，所以畀心機做到最好，要令自己滿意。但高潮後完騷，就覺得做咗我哋認為係100分嘅事，我哋仲可以做乜，嗰刻有啲不知所措。加上當時冇太多工作，有段時間同之前演唱會忙碌反差太大，好彩好快適應到。」
化妝：ChristineChan
髮型：FreddyChiu
Stylist：EmmaWallace