利物浦喺新一季英超將會轉着新牌子波衫，新合作協議令紅軍每年收到2,500萬鎊（約3億港元）贊助費。但我求大俠都幾擔心利記嘅球衣銷情。最新公佈嘅第２作客球衣，無論配色同設計都唔多掂，唔知會唔會變晒倉底貨。
紅軍上季同美國球衣生產商Warrior簽訂合作協議，球隊未來6年每年可收到2,500萬鎊贊助費。呢間波衫公司對香港球迷嚟講可能比較陌生，但睇佢哋嘅設計就唔多啱紅軍球迷口味。最先推出嘅主場球衣勉強都叫過到關，到作客球衣公佈時已經劣評如潮。
靈感來自前門將占士
至日前公開嘅第２作客波衫，英國《每日郵報》更以「Theworstjerseyever？（史上最肉酸球衣？）」作為標題。波衫以深紫色為主，同作客嘅黑色差唔多，咁到底幾時着黑色，幾時着紫色呢？加埋領位橙色邊、灰色袖配奇怪花紋，總之就係不倫不類。
據講呢件衫嘅設計靈感啟發自90年代效力嘅門將占士，當時所着嘅龍門衫。其實占士喺利記冇乜豐功偉業，又為乜要取材自佢呢？利記近年每年球衣銷售額大約係90萬件，唔知來季仲可唔可以維持到。
事實上新一季英超，唔少新波衫款式都備受爭議。除咗利記之外，不得不提嘅梗係曼聯新主場球衣，畀人笑話花紋似枱布。另外車路士嘅作客波衫都係麻麻，遠睇仲以為係馬賽嗰件㖭。至於衝擊升班英超失敗嘅卡迪夫城仲激，唔知係咪受咁大打擊，將百年傳統嘅藍色主場波衫改咗做紅色，惹嚟球迷激烈反對。
紅軍開操唔齊腳
另外，利記喺禮拜三已展開首課操練，但報到嘅人就唔算多，只有加歷查、盧卡斯同埋查理阿當等唔使踢歐國盃嘅球員，同新帥羅渣士傾下偈。
羅渣士上任至今仲未簽到新兵，幾乎到手嘅舊部基爾菲施古臣畀熱刺截糊不特止，仲要畀呢位冰島中場出口揶揄。施古臣話之所以選擇熱刺，係因為利記唔夠班：「我好享受同羅渣士合作，但前途問題始終要謹慎啲，球星如雲嘅熱刺先係做大事。」
