碧咸落實無緣倫奧的消息，幾天仍消化不了。由05年倫敦申奧成功到今日，萬千球迷等了7年，就是為看碧咸同傑斯在英國奧運隊重聚。這樣白等了7年，令人不禁大叫：皮亞斯！你家陣係咪搞私人恩怨？
談到碧咸，難免夾雜大量私人感情。對溫布頓那腳半場笠射開始，注定迷上。欣賞他不是因為靚仔，是其努力和拼搏精神。回想我都算與他「共過患難」。07年小弟踢波被踢斷腳，右腳小腿骨斷開三節，卧病在家時看到碧咸將由皇馬轉會美職聯，當時心想「咁同退休有咩分別？」竟然兩行眼淚流了出來；那時老婆走出廳驚問：「隻腳好痛呀？」原來心痛仲傷過斷腳！
碧咸是創造奇蹟的人。唔算高速，唔識扭波，天資平平，卻憑天天苦練，成就「七旋斬」絕技，當上世界頂級右翼，已是奇蹟。人人以為他到美職聯只為養老，豈料他為重返國家隊，竟能在34歲高齡返回歐洲頂級賽場；在AC米蘭多踢兩年，有入球有助攻，又是奇蹟。可惜關鍵時刻受傷，否則2010世界盃都有份。
在情，碧咸一直在倫敦申奧擔當關鍵角色。京奧閉幕禮，碧咸代表倫奧代表團出場，全場轟動，足見他在全球的感染力，絕對是倫敦申奧成功的一大助力。佢老人家恨踢奧運恨到出晒面，君子何不成人之美？
在理，碧咸在球場的作用，是大賽經驗和處理死球，都不是年齡會有絕對影響的。加上其魅力對全隊士氣的鼓動作用，更是難以計量。我就想不到英國隊中那位射罰球比碧咸明顯優勝了；3位超齡球員中，我亦看不到32歲的比拿美作用比碧咸大很多。
當年有麥卡倫高調棄用碧咸，卒之搞到08歐國盃外圍賽出局，「報應」不爽。今年又有皮亞斯的「情理不容」。現在只有等着以下場面出現：英國在比賽中落後，最後1分鐘在禁區頂博得罰球，所有人悲歎：「如果碧咸喺度就好喇……」
文：方柏翹
now足球評述員