奧運熱：奧運首度3D　水花濺埋身

倫敦奧運快將揭幕，就算飛唔到過去，留喺香港安坐家中，一樣有驚喜。皆因今屆屬史上首次採用3D器材拍攝，然後再以3D廣播技術，實時將立體影像由英國傳送到香港每一個家庭。只要你具備一部3DTV，唔只3D欄王，連水化四濺嘅逼真效果也活現眼前！

記者：陳國輝
攝影：劉永發、楊錦文
Model：[email protected]

專家推介3D必睇位

以3D技術製作運動項目，喺今屆歐聯賽事我已親身感受過，但個人認為，除咗球員大特寫以及入球後嘅騎呢慶祝方式之外，因電視畫面上嘅主體例如球員、足球等體積太細，即使運用咗3D，浮凸效果仍只算一般。而今屆奧運項目之中，由倫敦奧運大會主導下，原來並非「FullTeam」轉晒3D器材拍攝，有線電視廣播運作及工程部總監李元培（Patrick）就話，值得高興嘅係，香港人最關心嗰幾項賽事，包括田徑、跳水以及體操等，基本上全程可透過3D呈現眼前。佢仲話，每一項運動都有其3D「必睇位」，例如欣賞田徑賽事嗰陣，大家不妨從終點鏡頭前留意跑道上每位運動員衝刺嗰一刻；至於跳水、激流類賽事，各位亦可觀賞水花四濺時嘅3D效果，感覺會有現場感得多。

■有線廣播運作及工程部總監李元培

■開幕及閉幕都有3D效果，睇煙花、歌舞表演更精采。（圖為上屆北京奧運開幕）

■田徑類衝終點一刻，運動員好似衝至眼前一樣，3D效果最明顯。

■睇激流嘅重點係大動作以及水花四濺嘅3D效果。

有線3D器材曝光

趁未飛往倫敦之前，小記有幸走入有線製作部，見識一下佢哋採用嘅廣播級3D解碼器材。現場所見，除咗有用作控制幾十條頻道嘅巨型機組，呢次還採用專為3D而設嘅廣播級器材，包括Miranda3DConverter同埋Ericsson解碼器。究竟佢哋係乜東東？你可以懶理呢堆器材有幾勁，普羅大眾亦認為現場直播節目，點都唔夠3D電影咁震撼。咁諗原來錯晒，根據Patrick嘅解釋，其實今屆3D奧運節目訊號，係採用RealDSide-by-Side格式，並以15MbpsMPEG4編碼傳送，值得留意係，雖然只係50Hz頻率，或會產生些少閃爍或輕微窒格問題，不過解像度方面竟高達1080i，提供3D之餘仲係高清畫質，睇怕效果有可能直逼3D電影咁正。

■有線電視罕有地示範3D訊號接收及解碼情形，呢批器材亦已運往倫敦。

■有線眾多奧運頻道之中，只有一條提供3D訊號。

■Miranda3DConverter專為3D頻道而添置。

3D奧運追住睇（香港時間）

開幕典禮（7月27日深夜2時15分舉行）
閉幕典禮（8月12日深夜2時45分舉行）
游泳（7月27日至8月1日）
體操（7月27日至8月2日及8月5日至7日）
跳水（7月29日至8月1日及8月3日至8月10日）
田徑（8月3日至12日）
藝術體操（8月10日至12日）

＊非有線電視客戶，可先登記成基本用戶（月費$219），並選擇「高清英超、體育及娛樂組合」（月費$80），便可收看「2012倫敦奧運」及「奧運3D台」頻道。

查詢：1832888

手機照睇3D奧運

屋企無3D電視？又或者開緊工無時間睇？唔使擔心，因為手機上網一樣睇到3D！大家唔好搞錯，並非有線推出咗手機版3DChannel，只係你可透過3D手機，欣賞到具立體效果嘅奧運賽事，而且仲係毋須眼鏡嗰隻裸眼技術㖭！講緊係早前推出嗰款LG3DMAX，由於佢內置《3DConverter》軟件，即係話，任何以OpenGL編寫嘅程式，均可將2D影像變成3D。至於另一種「方式」，你亦可經3DMAX直上YouTube3D，觀賞已Upload嘅賽事精華片段，就算搭緊車、行緊路，也可以欣賞3D奧運！