七月一日有人上街示威（民陣話有四十萬人，警方話有六萬五千人，鍾庭耀指有九萬八千至十一萬二千），有人到馬場（三萬二千人），當然更有不少人離港渡假去也，例如唐英年夫婦。據馬場一啲消息人士講，唐生現於西班牙渡假，玩得好開心，正合乎李純恩常常掛在口邊嗰句：「恭喜唐英年！」有何值得恭喜？輸咗特首選舉，無官一身輕，唔駛煩死囉。記得競選之時，有傳媒不斷放風話唐英年僭建無誠信，能力低，假如仍然當選特首，七一會有十萬人上街抗議，正一係噏得出就噏。估唔到嘅係，唐英年因僭建而民望下跌，中央恐防流選而下令有關選委力捧梁振英上台，於是七一真係有四十萬人上街示威咯，梁生早上九時宣誓就職，下午維園有萬人空巷場面，叫佢下台，而主要引發點，可能就係梁生大宅有僭建，何其諷刺也！
馬場內廂房人頭湧湧，不少人係自會展觀禮之後走嚟馬場唞唞氣，輕鬆吓嘅，碰到一位唐營人士，問佢今年二三月之時，知唔知梁宅有僭建，點解唔揭露呢？犯咗孫子兵法大忌，知己不知彼噃，用現代術語講，就係不悉敵情，十分被動。佢微微嘆一聲：「仲講咁多做乜，講吓貼士好過啦，亨利係知知地嘅，不過佢話過唔好搞屋企私人嘢，除非傳媒披露，當時傳媒猛讚梁生口才了得，駡唐生想講大話都水皮過人，唔去追查梁宅，咁咪算囉！」當時係下午兩點幾，第五場即將開跑，左丁山與唐營人士傾完偈，趕去投注窗口，碰到不常到馬場嘅F太，佢話呢場12號叫做「咁都得」，加多一句：「梁生駡唐生之時，斬釘截鐵話自己屋企冇僭建，唐生唔識反駁，俾佢過咗骨，咁都得嘅，不如就買12號鴛鴦Q餐！一於博冷！」左丁山衰在信數據，話3號「樂馳」上次輸俾「吾誰與歸」，末段跑21.65秒，有咁強後勁，今次邊有得輸呀，堅持買3號。唉，理性分析竟然輸咗俾人地嘅福至心靈，「咁都得」跑第二，與另一冷馬「馬主明星」串Q，Q連位置Q收足千九銀，咁都得嘅！左丁山只係收到位置派彩十三大元！