宅錄:灰熊山谷極速礦車 27米倒Chok

宅錄:灰熊山谷極速礦車 27米倒Chok

香港迪士尼又有新嘢?新主題機動遊戲?俾小朋友玩嘅?啱一半!新主題區灰熊山谷剛開放供傳媒試玩,賣點係高27米、三分一時間倒後行嘅雙向穿山車,啱晒愛刺激嘅大朋友!想玩?要等到下周六正式開放。

記者:蘇麗珊
攝影:蔡家輝 
Model︰Suki、Annie@GME

首創雙向穿山車

穿過原有的「探險世界」園區,便會發現最新興建的「灰熊山谷」!整個區域都帶着濃厚的美國西部色彩;27米高的山谷是園區的一大地標,細看更會發現創新的雙向穿山車——灰熊山谷極速礦車,佢係依着地形山勢而建成,於園內縱橫交錯。
24個座位的極速礦車,外形雖有點似傳統過山車;上車後,雖則三分二時間會像傳統過山車,在山谷左穿右插作觀光,但餘下的時間,卻會突然向前衝,又或急轉彎,比傳統過山車還要Chok。而當礦車上到達約27米高的山谷頂點時,更會突然急速倒後行,感覺係全身離凳而起!Model試後感,係整整三分鐘車程,會不自覺衝向前、向後Chok及向外篩,相當好玩。但因安全起見,112cm以下的小孩就恕不招待。

■「灰熊山谷極速礦車」會穿過河流等地方。

兜口兜面極速礦車

仿黃石公園噴泉

Chok到嘔飯之後,想降降溫?可走過隔籬噴泉山谷。咪以為佢只係一般噴水裝置,其實係參照咗著名旅遊景點——美國黃石公園的自然山景而建成,噴出的水時高時低,喺最高一刻更可噴到三、四層樓的高度,在悶熱的夏天嬉水,確實凉快!
另外,喜愛街頭音樂者,更可在特定時間欣賞「灰熊山谷迎賓禮」,樂手及舞蹈員會四出載歌載舞。為方便愛影相的港人,園區特設兩大影相區域:「西部囚室」及「金石檢測所」,影幾耐都無問題。

■特定時間可欣賞樂手及舞蹈員載歌載舞。

■遊人可化身頭號通緝犯,拍照留念。

■「噴泉山谷」在日光下噴出泉水,令彩虹活現眼前。

■灰熊山谷竟有金礦,並採出「幸運黃金石」。

■為迎合園區佈置,米奇及米妮也穿上西部服飾。

熊家族出沒

講咗咁耐,究竟「灰熊山谷」的灰熊在哪裏?原來山谷的主角Rocky熊爸爸、Lode熊媽媽及Nugget熊BB,會不定時在園區內出現,只要碰到牠們,牠們會好樂意同你合照,更會擺出不同Pose,分分鐘比你還要Chok。
離開時,當然要做指定動作——掃紀念品。這方面也不會令你失望,熊家族毛公仔、熊仔帽、西部牛仔帽、大人小童Tee、毛巾、水樽一應俱全。
然而,「灰熊山谷」開幕日(7月14日)正是對手海洋公園新景區「冰極天地」開幕的第二天,相信,本地兩大樂園今次又要來一場PK了!

■園內設幸運黃金石小食亭,必食香脆炸魚柳。($60連飲品)

■店舖會出售熊家族產品,如公仔、帽、水樽等。$60-$220

■更可購買熊Tee及西部牛仔帽作留念。Tee$195、帽$180

香港迪士尼樂園 門票︰$100-$399
查詢︰ http://park.hongkongdisneyland.com/