祖師戀之現形記
容祖兒和劉浩龍驚爆戀情，令密友何韻詩嬲爆，前晚祖兒和阿詩都分別出席活動，阿詩繼續殘爆現身，反觀祖兒就心廣體胖不少，雙下巴乍現。阿詩前晚提及祖兒和師兄時似乎仍然耿耿於懷，是否仍嬲兩人時，她即以「冇呀，冇呀！」來敷衍作答。
容祖兒和劉浩龍的「祖師戀」熱爆全城，輸家何韻詩避世多天後，早前愁爆復工，前晚阿詩到觀塘綵排明日在灣仔會展舉行的何韻詩×蕭敬騰異人世界演唱會，殘爆阿詩自言有年半沒在港開騷，打趣表示自己久休復出，會否邀請朋友撐場時，她即敏感說：「哎呀，冇呀，有興趣就會嚟睇。」
二人口供唔夾
對於祖兒表示有信心與她同台時，阿詩即反問：「吓？唔使信心，總之冇嘢要化解，一路我都冇去回應同證實過任何嘢。」又直言沒有人找她們同台演出，由於阿詩回答問題時經常搖擺不定，她即自嘲要搖下搖下才可搖甩問題。
問到會否主動找祖兒時，阿詩避忌說：「唔答嘞呢啲，專注音樂會演出，注意力放喺演出上。」祖兒曾說人工是包埋這些負面新聞，阿詩亦說：「不嬲入行預咗有附帶條件，咁多年有好多新聞傳聞，自己都盡量唔想再去回應，再講亦唔會平反。」當問到有否嬲祖兒和師兄時，阿詩就以沒有來敷衍作答，亦不肯正面回應兩人是否仍是朋友，更說：「唔答呀，唔知呀，由得大家揣測，所有人都係我朋友，個個都係朋友。」
被指日前與情敵Heison舊愛麻利亞失戀遊行，阿詩大嘆報道十分無聊，只希望報道會自然死去。一向愛在微博留言的阿詩前日贊同facebook聯合創辦人的同性婚禮，並留言道：「你們可以不接受，可以繼續反對歧視，但時代告訴我們，人類的心胸正在慢慢進化中。」
至於祖兒前晚到尖沙嘴綵排《2012翡翠歌星紅白鬥》，昨日又到山頂為其蠟像更換新裝，她自爆現時身形與06年不同，雖然她自稱消瘦不少，但前晚她排舞時卻雙下巴乍現。問到另一半是否滿意她身形時，祖兒大反應說：「唔知你噏乜，你哋得到答案就得，我唔想每日回應人哋嘅嘢，唔想因為咁影響自己工作，希望大家多多體諒。」
拒撐阿詩開騷
記者提議她搞gathering拉攏師兄和阿詩，祖兒就表示如果搞大家亦不會見到，反而她希望自然一點，免得好似煞有介事，反而會十分奇怪，她亦以工作為由而自言不會欣賞阿詩的演唱會。
採訪、攝影：何慧斯、張俊銘、楊潔雯