【我得寵】
模劉雅婷（Toby）有個爆房球星男友陳肇麒，上了娛樂頭條，感情生活勁爆外，就連家中飼養的寵物都特別過人，她爸媽是元朗農民，自幼家中便有黃牛為伴。Toby日前牛女上身，烈日下領黃牛落田享受耕種樂，但黃牛忽然發脾氣，Toby惟有拿起膠喉為牠降火，又餵牠吃竹蔗葉。
撰文：比華利
城巿人居住空間有限，要飼養寵物，普遍選擇貓或狗，但模劉雅婷卻擁有一頭幾百斤重的黃牛，取名「牛牛」，事緣她的父母在元朗務農為生，養大六名子女。Toby對家中好幫手牛牛情有獨鍾，日前帶牠落田耕種，雖然烈日當空，天氣非常酷熱，但牛牛任勞任怨，Toby採摘竹蔗葉慰勞牠。
為食牛擺尾示威
嬌滴滴的Toby拖着牛牛穿梭農田小徑，其龐大身軀有點霸氣，但其實性格溫馴，她輕輕一拉牽着牛牛鼻子的繩索，大聲喝止停下來，牛牛馬上聽命。Toby把耕種工具逐一放在牛牛身上，準備齊齊落田勞動時，牛牛又乖巧配合，但始終天氣炎熱，辛勞了一陣子，牛牛的動作開始變得緩慢，主人Toby也識做給愛寵下午茶時間。
Toby先把牛牛拉到陰凉地方，給牠一桶清水解渴，可是大家就見證了俗語有云「牛唔飲水唔㩒得牛頭低」的一幕，牛牛只喝了一小口便誓不低頭，搞到Toby手足無措，於是她企圖用膠喉替牛牛身上灑水降溫，牛牛最初都願意，但由於水力過勁射到牠頭部，牛牛開始發脾氣和揚尾示威，還牛咁眼望實女主人，大發牛脾氣，令她十分尷尬。Toby見狀便出動第三招，摘下新鮮竹蔗葉餵牛牛，終得以降服為食牛。
越幫越忙險走失
Toby表示牛牛是家中飼養過的第三頭牛，她說：「佢家大約九歲，佢細細隻我哋就買佢番嚟，過往啲牛要成幾千蚊一隻，但呢隻牛透過漁農署申請，得到資助，畀500蚊就可以帶佢返屋企，養牛同貓狗一樣要領牌。」Toby大讚牛牛是雙親下田的得力助手，她說：「佢係我哋生財工具，好有貢獻，佢日日都勤力工作，不過我哋都會畀佢哋休息時間，有時唔使做嘢就拖佢去遠啲嘅地方，綁佢喺樹下，等佢邊散步，邊食草。」
問到Toby過往與牛相處的趣事，她說：「我有次試過幫阿爸放牛，點知越幫越忙，條繩綁唔實，變咗走牛，最後佢俾人發現橫行霸道企喺馬路，仲勞動居民報警。」
搞喊牛牛心痛
Toby在元朗圍村長大，印象中共養過三頭黃牛，如果牠們保持健壯，一般壽命都會逾20歲。Toby對牛隻並不陌生，還會視牠們如家人般看待，記得幾年前家中的牛因頸生瘤，經過獸醫搶救無效，需要帶往人道毀滅，Toby一家都依依不捨，她說：「隻牛好有靈性，佢聽到話要劏佢，牛之將死竟然流下眼淚，呢一幕我好記得，我哋幾兄弟姊妹睇到都喊咗出嚟，始終佢真係我屋企嘅好幫手。」
每月冲凉保衞生
Toby表示養牛要注意牠的飲食：「牛係好粗生，只要畀佢有飽餐新鮮青草，佢哋就好滿足，有時天氣太熱要幫佢哋灑水降溫，等佢哋散咗陣暑氣，佢哋脾氣都好啲。」Toby指牛易生蝨，所以每月要為牠們徹底冲凉，保持衞生。