曼聯喺今夏簽入日本國腳香川真司（ShinjiKagawa），唔少球迷都希望買番件波衫支持吓，家終於可以去燙字喇！香川之前講過，唔打算承繼紅魔7號球衣，而曼聯方面就喺星期二公佈咗佢嘅波衫「冧巴」，就係26號；至於奧雲離隊後騰出嚟嘅7號，就由路爾斯華倫西亞（AntonioValencia）接手。
7號對於曼聯嚟講，絕對係代表傳奇，以前有佐治貝斯、笠臣同簡東拿，近代就有碧咸同C朗，都係着住紅魔7號馳騁球場；奧雲喺兩年前加盟後接棒，唔少人都覺得佢令到件7號波衫失色咗。曼聯球會就宣佈，喺12/13球季，呢件令人關注嘅7號球衣，就由本身着25號嘅路爾斯華倫西亞承繼；華倫西亞星味可能爭少少，不過佢上季當選曼聯最佳球員，論實力梗配得起呢件7號波衫啦。
棄莫迪歷改斟摩天奴
至於兩名新兵香川真司同歷克包維，分別會用26同25號。香川喺兩年前登陸歐洲球壇，幫多蒙特連贏兩屆德甲冠軍，實力受到認同；新球季去到更高水平嘅英超，香川肯定更加受注目。
領隊費格遜日前接受訪問時話，曼聯喺夏天仲會繼續增兵，簽多一兩個球員；傳媒就指紅魔已經放棄咗熱刺嘅莫迪歷，轉而出價2,500萬鎊斟介波圖嘅葡萄牙中場摩天奴。紅魔家陣中剩番嘅靚「冧巴」唔多，如果冇人走就得番2號同20號，唔知摩天奴真係嚟到後會點揀呢？
不過長期孭重債嘅曼聯，點都要賣走啲冗員套現；有傳加拉塔沙雷睇中咗前鋒貝碧托夫，加上同拿尼傾續約冇進展，亦有可能將佢出售，咁到時咪有多啲「冧巴」揀囉。
新波衫行貨聽日開賣
唔知係咪早幾年夏格維斯由拜仁慕尼黑轉投曼聯後，先喺社區盾條波褲着23號，到英超開「咧」後改着4號，令唔少球迷有陰影；據旺角波衫舖KitroomSports老闆Kan透露，AV7同香川件26號，都有唔少球迷喺網上留名入貨。至於上月初返咗一批水貨嘅時候，就見過有個心急球迷等唔切印咗件7號香川。
至於新一季紅魔波衫嘅行貨幾時出？我求大俠向製造商一剔牌收過風，原來聽日就會同阿仙奴嘅新衫，喺各大門市發售，每件定價539蚊（未連印字），有買就趁手喇！
英超6強季前熱身賽賽程
新一季英超喺下月18號開鑼，各隊即將開操，7月中就會陸續展開季前熱身賽。唔知係為熱身定為商業利益，多支球隊都飛越大半個地球，去北美或者亞洲獻技；不過衞冕嘅曼城似乎唔多信踢得多熱身賽，會對球隊狀態有大幫助，喺社區盾前只係安排咗兩場波。
