《民企風暴一周年》
去年6月，調查機構渾水研究（MuddyWaters）向綠森集團（094）母公司嘉漢林業展開狙擊，引發一眾同行效法，加上歐債危機這陣「東風」，市場即時刮起十級民企風暴，高手老散無一倖免。業績期將至，新一輪民企風暴隨時打到嚟！上市組
上月內房龍頭恒大地產（3333）被另一調查公司香櫞（Citron）質疑其資不抵債、向投資者發報虛假訊息等，雖然恒大馬上反擊，但足見民企風暴未止。綜合各方意見，歐債危機未解決、內地銀根問題無改善，都是風暴未止的原因。
一年過去，多家高危民企「爆煲」，師奶散戶到神級股神統統損手爛腳，近期多家民企公佈業績都出現放緩或倒退，散戶對民企避之則吉，但股神高手、甚至大孖沙對民企看似仍未死心。
要數在民企風暴「最傷」，非「沽神」保爾森莫屬，他一度持有美國上市的嘉漢林業14%流通股，自該股被渾水炮轟後，股價暴瀉不止，沽神最終壯士斷臂，盡沽手持股份，市傳該役令其基金賬面蝕約36億元。至於歐洲股神、富達基金投資總裁安東尼波頓旗下富達中國特殊情況基金、「中國女股神」劉央主理的西京投資中國基金及「金手指」謝清海主理的惠理基金旗下中華匯聚基金，去年都因押注民企而錄得兩至三成的負回報。
料由經濟放緩引爆
本周初，多次獲彤叔加注的蒙古能源（276）公佈上年度勁蝕逾48億元、引來李嘉誠入股的中聚電池（729）公佈四連蝕，看來民企仍未翻身。「細價股揀股王」、瑞信中小企證券研究部主管劉紹文認為，由去年中開始刮起的民企風暴還未完全過去，「若果由會計問題而引爆嘅民企，我認同應該已經爆得七七八八，但若果係由經濟放緩，從而引發嘅民企風暴，我認為還在進行中。」他說：「好似股神嘅名言，當潮水退嘅時候，便知道邊個無着泳褲……我覺得即將嚟緊嘅中期業績，將會係新一輪民企風暴催化劑。」
有對冲基金經理表示，過去一年的民企風暴，質素最差、最容易被「踢爆」的民企基本上都已出事，「要死嘅都已經死晒，果樹上易摘的果實已被摘下」，那些調查機構已不再如去年般輕易抽出離譜個案。
「內地水頭問題未有大改善，但年初溫總講明要銀行支援中小企，情況應不會惡化。」他未敢斷言不會再爆發新一輪民企風暴，但規模及效應肯定不會像去年般厲害，相信今年市場會聚焦外圍經濟疲弱如何影響內地企業，重回基本因素。
謝清海蝕錢仍增持
曾安排不少民企在港上市的招商證券董事總經理溫天納亦相信，或再有民企出事，「雖然唔少民企被指造假嘅指控只係子虛有實，但已經損害咗部份投資者對民企嘅信心，有啲嚴重到唔敢再投資民企！」
日後基金界會否一刀切向民企說不？有基金經理表示無可能，「例如內需股，絕大部份都係民企，根本避唔到……但家會主要睇龍頭嗰幾隻。」
去年投資民企「勁蝕」的安東尼波頓、劉央及謝清海旗下基金，今年不時仍有增持民企股，而彤叔及李嘉誠兩大孖沙上周亦分別增持之前同樣傳出過負面新聞的銀基（886）及瑞年（2010）。財富的魔力真是沒法擋。
投資者心聲
李女士：蝕掟大成生化
「數月前驚聞民企出事，已立刻將手上仍未涉及任何傳聞嘅民企股─大成生化（809）沽售，蝕咗一、二千蚊。其實就算公司澄清，仍會有懷疑態度，唔知真定假，如果係真，股價會繼續插落去；如果唔係，可以遲啲再買返！」
呂先生：寧轉攻內銀股
「曾經沾手比亞迪（1211），其實投資民企始終係隔山買牛，不太安心，最後平手離場。民企股股價可以一日升天，一日可以落地獄，之後又忽然停牌，負責人畀人逮捕或走路，所以投資央企、內銀股始終較安全。」
陳伯：買較安全股份
「自己有50年投資經驗，買股票『要剔走啲民企』，投資較安全嘅H股或藍籌股。而民企股同埋細價股又冇息派、又冇錢收，而且好多時亦係由莊家托高價後沽貨，H股則有息派，即使市況低迷都可以收息。」
