香港娛樂圈因為有內地龐大市場撐住，所以唔少藝人賺人仔賺到盤滿砵滿，當中唔少人仲做埋業主，佢哋都喺家樓市高企時期入市投資，好似主力喺內地搵真銀嘅謝霆鋒，同密密喺內地登台嘅古巨基，佢哋上個月就分別以近一億同5千幾萬買入中環擺花街嘅地舖。
呎價逾二萬
現年44歲嘅李克勤亦非常勤力，雖然佢唔似霆鋒同基仔咁頻頻返內地賺人仔，但係佢嘅工作量都唔少，一直都冇停手，早排仲為now主持歐國盃嘅節目，密密賺錢養家照顧妻兒。
克勤為咗老婆同囝囝，仲好捨得買咗層靚樓，上月佢同太太盧淑儀以公司名義，豪擲5,410萬買入香港仔壽臣山道曉穎花園一個複式單位，面積2,662呎，呎價20,323蚊。曉穎花園係低密度住宅，相信克勤買入之後會自住居多，可以減少一對寶貝仔李立仁同李力司被追訪嘅機會。