同男友許志安傳婚訊嘅鄭秀文（Sammi），近排再為精工錶做代言人兼拍廣告，仲由著名電影美術指導余家安做形象設計，為Sammi設計多款造型。拍攝時Sammi笑唔停，不時同工作人員交流，每次影完相都會睇番效果再提出意見，希望有最好效果。雖然拍咗成日，但Sammi依然精神奕奕，流露出甜絲絲笑容，唔通真係人逢喜事精神爽？