大手買賣高沽低揸，那份股壇狙擊手的快感，成為不少年輕投資者追求的東西。住所過千呎的少年股神蕭輝，亦以交易員（他稱為操盤手）為其目標，並誇口：「操盤手就係我家做緊嘅嘢！」不過，兩代少年股神、美女股神以過來人身份向蕭輝贈言，想做Trader有排學。蕭輝今年中大畢業，未來有兩個目標，首要教人投資，第二是當交易員。
對於教人投資，他表示：「家太多講座，請啲大師過嚟，講一堆嘢，講幾個Number，跟住（觀眾）抄，我唔想咁樣，想教你一套（投資）方法。」
對於小師弟年少志大，少年股神師姐、晉身「美女股神」行列的申銀萬國證券香港聯席董事王雅媛提醒，要成功先讀書，過於急攻近利，會得不償失變輸家。
王雅媛07年參加模擬投資比賽，將100萬元本金於兩個月激賺20倍而上位。王雅媛坦言，自己當年亦靠家人提供十多萬資金落場炒股，但現時已忘記當年的戰績。
大學成績要好
她提醒少年股神：「要成為操盤手，GPA（大學平均成績）一定要好，唔係好難入行。」她又認為，學生應該多參加其他活動，學習與人打交道，強調「學生唔應該淨係炒股」。