ByTheWay，圖多字少精裝印刷硬皮封面嘅書籍有個別稱叫coffeetablebook，我叫佢做「啡書」，內容多是附庸風雅無關痛癢，即係放在茶几嘆杯咖啡得閒揭吓嗰種，唔使點上心啫！尤其德國出版社Taschen嗰啲圖集叢書，百零蚊貨仔，擔定張凳仔！不過佢哋有本《HelmutNewton：Sumo》就真係令我恨得咬牙切齒，呢本嘢內容盡是HelmutNewton嘅攝影作品，佢老人家可謂20世紀最重要嘅時裝攝影師，佢嘅作品接近群眾之餘又自成一派，佢講過：「我嘅作品唔係用嚟掛在美術館㗎！」雖然最後都畀唔少美術館接收晒。
呢本書，最巴閉嘅地方就係「嘥屎」，講尺寸，30x50cm，講重量，35.4kg，厚464頁，最盞鬼係仲有個PhilippeStarck設計嘅書架送，放本書上去，就十足一張coffeetable嘞！本書在2000年出版，限量一萬套，編號「1/10,000」的仲有齊過百書中模特簽名，當年在柏林拍賣價為43萬美元天價，即時成為最昂貴嘅出版物。香港當年都叫做分到幾套，不過嗖一聲就畀人搶購晒，我叫做有幸摸過吓囉！過咗幾年，HelmutNewton在2004年就與世長辭了！錯過第一版的，今年有幸補購噃，Taschen決定喺8月推出Revised版，內容由佢老婆JuneNewton再執過，資料就更加準確喇。賣150美元，唔算貴，不過無咗PhilippeStarck個書架送，爭咗好多囉！
撰文：曾凡