歐洲國家盃功德圓滿，球迷興奮完畢，以後個幾月唔駛捱眼瞓咯，倫敦奧運好快就會舉行，但奧運賽事嘅吸引力，同意大利大戰德國，西班牙大戰意大利嘅球賽，相差好遠啫，冇乜節目值得我地三更半夜起身，兼且足球在夜晚踢，奧運各類賽事，多在日間舉行，香港與倫敦相差七小時，我地在午夜十二時之前，仍然可以收睇不少節目。
成個月嚟，左丁山只係落注過一場賽事，就係押注意大利贏德國，馬會開出意大利勝出嘅賠率居然有4.7倍，實在太吸引，點解要買德國勝呀，馬會可能開錯盤口，益咗左丁山呢類人。不過左丁山忍手唔賭波啫，原來大把人賭，網上所見，大大小小賭博網站眾多，令賭客目不暇給，究竟有幾多人上網下注，幾難估計，但全世界若非好多賭客，賭網點解會咁多花款呢，仲有埋中文繁體、簡體版㖭，你估賭錢係要識英文乎？
除咗賭網，當然有本地與內地相結合嘅外圍，日前警察破獲一個外圍集團，從搜獲紀錄得知，五日內收受咗五千萬元投注，數目驚人。其實在香港賭波，若不透過馬會足智彩而玩外圍或向海外網站下注嘅話，就係犯法，但點解不少人為咗足球落注，捨馬會而去外圍或網站呢？答案簡單到極，就係香港特區政府向馬會抽稅極高，係毛利嘅50%，馬會係莊家，有賠錢風險，又要俾稅，嗌出嚟嘅賠率梗係低啲，與外圍及網站（完全唔駛交稅）相比，就唔夠競爭力啦，但係特區政府，尤其是民政事務局，好似不食人間煙火咁，點極都唔明，係唔肯適應環球市場競爭環境，降低稅率，咪造就咗外圍與網站生意興旺囉，再加上澳門「彩票有限公司」收受足球與籃球賭注，大展拳腳，以後幾年同香港馬會競爭，馬會更蝕底。有啲自鳴清高之人話，馬會壟斷，香港又唔恨錢，駛乜要減稅競爭呀，此乃淺薄之言。須知道，只有馬會係慈善團體，外圍/網站/澳門係私人牟利公司，只有馬會先至會將賺到嘅足智彩交晒稅，捐晒做慈善，惠益本港社群，馬會唔夠爭，賭池大量外流，會益咗邊個呀？傷害咗本港窮人㖭！梁特首口口聲聲話扶貧，唔知識唔識諗埋呢樣！