【本報訊】上網識朋友，小心誤中「傳銷局」！有傳銷公司窺準香港「盛女」愛在交友網結識異性，竟派出六呎壯男混入「meetu友緣人」做餌，極速「媾女」再女方碌卡買傳銷產品。《蘋果》女記者進入交友網，直擊傳銷男如何扮成港女救世主般，將媾女變生意。記者：關震海、蕭逸居、黃江奇
「我當佢朋友，冇諗過佢存心呃我！」29歲做秘書的Dora，去年12月在meetu友緣人認識了26歲的Andres，對方在電話內噓寒問暖，並提出單獨約會。「最初好似朋友咁食吓飯，但到第五次，佢問我想唔想賺多啲錢。」Dora表示Andres得知她愛做facial後，游說她在一個網站開戶口買美容療程，介紹朋友更可分佣，最後Dora在網上開戶，買了3,000元脫唇毛服務。
一坐低讚「香水好香」
一周後，Andres以慶祝生日為名，約Dora到尖沙嘴赫德道一幢商業大廈內的「私竇」。「裏面好似一間酒吧，坐咗一枱枱人，Andres同另外一對男女不斷向我推銷，話只要買5萬蚊嘢就可以做代理賺大錢。」其間不斷傳閱會員獲發大額支票的相片，又稱月賺10萬元很容易。三人由晚上9時至凌晨1時，不斷疲勞轟炸，Dora吃不消下碌卡買了4.8萬元的美容產品，成為傳銷下線。
記者在meetu友緣人開戶口，未上載「大頭照」，在meetu屬VIP的Andres已急不及待留言「Hi~mind做個friendma??（嗨！介意做朋友嗎？）」，並留下手機號碼，約記者到銅鑼灣吃飯。
約會當日，六呎高的他甫見面便俯身靠近記者的肩膀說：「你啲香水好香！」記者坐下後點了杯Latte，Andres便使出一招「投其所好」，表示正跟咖啡師傅學「打泡」，還在手機展示多張疑似網上下載的咖啡照。記者不禁問：「點解個杯咁茶餐廳？」他卻死撐：「意大利餐廳啲Latte係咁㗎！」
打孝順牌勸幫補家計
相見不足一小時，Andres就打「孝順牌」：「我覺得你好nice（親切），所以我會同你講，其實我事業心咁重，都係想幫我老竇爭口氣。」他眉頭一皺，「我老竇以前做電子零件，屋企住窩打老道，有兩張枱咁大嘅噴水池同魚缸……唉！家道中落，97年賣晒所有嘢，老竇家都係揸巴士……」
之後他更踩低港男，「香港男女比例七比三，當中好多係宅男，一個月得萬幾蚊，自己都唔夠使，點養你？」然後順勢轉入正題，「我哋幫醫生做市場推廣，推銷美容療程同產品」。他拿出手提電腦，表示在網上開設「i-SHOP」，購買和推銷「香港醫學抗衰老中心」、「香港危疾預防中心」和「I-FORMULA」的產品和療程，可以分佣，「藝人森美同楊思琦都成日幫襯！」
見記者不為所動，三小時後，他開始發功︰「你家有冇（信用）卡，邊張？恒生？我家搞埋手續。」記者要求到店內視察，他說：「你信我！想唔想媽媽多8,000蚊家用提早退休？」記者最後堅決離去。