鄭伊健近日密鑼緊鼓為下月舉行嘅《LightandShadow演唱會》做宣傳同綵排，聽聞有炒家將伊健啲演唱會飛炒賣，伊健聽到都覺得好無奈，佢希望fans要喺正常渠道買飛，唔好助長啲黃牛黨。
雖然要忙於準備個唱，但日前伊健都抽時間去跑馬地為某卡拉OK拍攝短片，當日佢以一身素色打扮出現，而導演就以當年伊健出道拍嘅飲品廣告做藍本，要佢同女主角重演偶遇嘅經典場面。
不過，拍拍吓有架的士駛過，司機突然停車再開窗大叫：「伊健我好鍾意你！」司機仲即刻用手提電話狂影伊健。之後伊健話，有個大男人當眾話好鍾意自己，令佢覺得幾搞笑。
遊舊地念羅文
其實當日拍攝過程都好輕鬆，不過伊健似乎心事重重，原來因為外景地點喺佢已故恩師羅文故居附近，伊健話：「到場一刻真係有諗番以前，始終以前成日都會去籮記屋企，真係有好多回憶。其實我有時都會揸車去嗰度，因為嗰度嘅環境真係好靚，唔似家周圍都太過現代化。」