七月一日中午在馬場碰到好多人，個個話是晚吃完晚飯就上床，七月二日早上二時半起身睇歐洲國家盃決賽，西班牙對意大利，一隊號稱係地上最強兵團，奪標大熱門，一隊係西班牙從未在常規比賽時間贏過嘅意大利：有鋼門保方鎮守龍門，有傳球大師派路調校進攻方面及節奏，有超級馬里奧，一時超蠢，一時超勁嘅巴路迪尼在前面衝鋒陷陣，西意兩陣對壘，應該好好睇！
講起地上最強兵團，馬場一位口痕友對左丁山講：「你知唔知道邊隻馬係地上最強？」左丁山不假思索咁話：「范高爾啦，魚子精華啦，香港有隻『小橋流水』揚威雅士葛短途一級賽，堪稱本地馬場上最強！」馬迷咪咪嘴笑：「你都唔係好識馬啫喎，嗱，第五班馬有一隻馬就叫做『地上最強』，跑六場大概輸咗六十個馬位啦！」馬主係邊個呀？原來係香港大學校友會（Syndicate），老牌馬主也，好耐以前有馬「金碧」、「銀碧」，成績不俗，不過今次隻馬就新嫩啲。馬迷話：「取馬名不可以太過強橫霸道或者過份無厘頭，呢隻『地上最強』嘅英文名竟然係BarcelonaToo，笑壞人啦！」唔，以前有隻馬叫做CheeseCake（芝士餅），中文名大概貪好玩，譯做「祗是激」，結果激親嘅就係馬主與馬迷。
開波嘞，西班牙藝高人膽大，仍然排出四六陣式，冇前鋒，但六個中場人人腳法純熟，走位靈活，使出西班牙（其實係巴塞發明）絕技，三角短傳走位，好快就控制戰局，哎吔弊弊弊，意大利全隊慢半拍，與打德國隊嗰種信心與氣勢，相差好遠噃，可能球員年紀較大，休息唔夠，身軀疲乏走動不靈，只憑意志負隅頑抗，但中堅走甩法比加斯，俾佢在近門底線交出，矮細嘅大衞施華居然可以頭槌頂入，完了，對住西班牙最壞嘅開局就係俾西班牙首開紀錄，之後唯有放棄死守方式，要谷上前搶攻，一谷，後防就有空位益晒沙維、恩尼斯達嘅短傳與沙比阿朗素之長傳。果不其然，西班牙先數一粒之後，走位傳送如流水行雲，直情係足球藝術表演。至於後來意大利因傷而十人應戰，大敗零比四，已是後話。英利物浦名將AlanHensen在BBC話：「以後三四十年，球迷仍會討論西班牙在今場上半場嘅表演！」除咗阿根廷、巴西之外，仲有邊個國家敢話有機會贏西班牙？