香港改朝換代的7.1那天，本應像1997、2005一樣，港人起碼仲有些許的希冀同盼望，雖然往後發現都不過是一場誤會，都是因為有所期望，所以才會失望。但在前天，卻是數十萬人上街為第三任特首贈興，即係連那丁點的希望都記唔到賬。我身為其中一位「集體逛街」的市民，心情其實有點矛盾。講真在兩害取其輕之間，唔好意思，志在「入場當贏」嘅嗰位從不在「被考慮」之列，當日我都有投了CY虛擬的一票，或多或少都表達了我的一些憧憬，沒想到，未曾出Q幾已撻死。莫講話政治蜜月期，直頭係結婚宣誓嗰陣都未問完「有冇人……」，就已經成村人衝晒入間教堂大嗌「反對」！而嗰陣我嘅心情實在納悶到連口號都唔係好想嗌。
「狼」非董伯貪曾可比
始終嗌完、嘈咗之後，港人都仲係要被迫盲婚啞嫁呢隻狼，仲要面對佢成棚嘅狐朋狗黨。往後我哋可以點樣「與狼共舞」守身自處先係問題。呢隻新「狼」非以前嘅董伯同貪曾可比，前者只是眾裏尋他，雖昏庸卻不失德；後者亦不過時來風送，水鬼升城隍，小才大用。然「狼」卻是國家重點栽培，悉心扶植，其人也是處心積慮，甘於蟄伏。待時間一到才展現一身歹功，媲美「西毒」，既有西環在後傳功助陣，復懷淬毒暗器隨手殺敵，那位只懂點花拳繡腿的公子哥兒又點會唔一敗塗地。然唐公子都總算在其政治生涯裏面做咗一件最有價值嘅事，就係畀我哋見識到呢位「老毒物」嘅手段。
超巨水馬 強權施政預警
惟廣大市民當會更加知「碇」，明白到往後唔單止要靠對眼對耳，不痛不癢地去「觀其言，察其行」，呢啲「放生」行為都係留番畀啲識時務者。而我哋就要隨時準備用埋自己雙手，仲有雙腳去維權爭益，先能與之匹「敵」。吓，佢家陣都只不過係講吓大話、搞吓小動作啫，使唔使視之為敵人咁大陣仗呀？各位，人未上任就已經係其身不正，待罪橫行，往後掌權豈會不為所欲為？況且唔單止傳統黨報會護駕，還有更多「求朱者赤」的傳媒會虛議暗合。文宣以外，當然少不了奉旨而行的警力，超巨水馬和強化噴霧亦作了未來強權施政的最好預警。為政者只要有不仁之念，豈能再以公僕視之，而是市民公敵。面對公敵，只有抗爭到底。
盧先亞