【祖師戀之為愛爭氣】驚爆戀情的容祖兒和劉浩龍成為城中熱話，男方被網民狂插封「流毒膿」，日前譚詠麟更搞笑地指佩服劉浩龍可以拗直祖兒，但阿倫昨日即在微博補鑊大讚祖兒。昨日在九龍灣現身的祖兒似乎發覺戀情不被看好，男友更成眾矢之的，難怪她坦言希望得到眾人的祝福。
容祖兒昨日在九龍灣展貿出席暗中作樂2012記者會，日前譚詠麟表示佩服劉浩龍可以拗直祖兒，昨日阿倫在微博留言：「祖兒見慣世面經得起風浪，對任何回應都很得體，的確有大將之風。」擺明大讚祖兒補鑊，祖兒表示前晚在佐敦錄音室為某活動歌曲錄音，現場她見到阿倫，不過卻未見過氣斷背緋聞情人何韻詩和現任男友劉浩龍，她否認刻意避開。
繼續工作零壓力
會否叫阿倫以後要小心說話？祖兒即說：「我邊有呢個資格呀！」再問有否嬲阿倫？祖兒以高八度的聲線說：「梗係冇喇。」連日不少fans和網友都關注祖師戀，可惜劉浩龍被外界狂插，問祖兒會否覺得有壓力？她表示：「冇乜壓力，都係繼續工作，人工包㗎嘛，唔通我唔明咩，所有感情嘅嘢唔會講，講其他嘢就講乜都得，大家對我有乜嘢評價，我都係多謝。」
會否擔心孤獨終老？祖兒笑說：「好難講㗎，邊個知最後係點，我明白你哋關心，唔使覺得我好唔抵，大家咁錫我已經好好，我都好希望所有嘢得到你哋嘅祝福。」有人覺得祖兒被抽水做宣傳，她說：「冇冇冇，我唔希望大家咁諗，對我都唔公平，搞到我好似好蠢。」有否被老闆楊受成罵笨？她說：「啋，老闆話我爭氣。」
黃耀明關心聆聽
同場的黃耀明私下與祖兒和何韻詩甚老友，明哥說：「唔會尷尬，我好公平，每個人都有個新檔案，我只係做聆聽者，佢哋嘅問題就自己解決，我相信呢啲誤會遲早可以解決，只要係真心做好朋友，冇嘢係唔可以解決。」
此外，對於七一遊行人數有幾個版本，明哥說：「我諗中間一定有差距，但係有感覺嘅人一定會感覺到今次嘅氣場係好巨大，我諗呢樣嘢政府係不能否認。」
採訪、攝影：何慧斯
