好多證券行老闆同銀行高層鍾意約人喺會所食飯，貪會所實行會員制，唔係人人入到去，有身份象徵之餘，地方確實舒服啲，私隱度高啲方便傾偈。但係呢個月佢哋就少咗一個選擇，事關上海菜好出名嘅蘇浙滬同鄉會裝修，要8月1號先重開。
食飯要做會員
喺中環嘅蘇浙有好多名菜，諗起佢啲燻蛋、脆鱔同八寶飯已經令人口水流，就連金管局前總裁任志剛都係蘇浙粉絲。喺任總年代，金管局搞傳媒春茗或者飯局，如果唔係喺大本營，就多數喺蘇浙，記憶所及，每次都有燻蛋！下次見到任總，除咗問聯滙檢討，仲要問下佢掛唔掛住啲燻蛋先得。
蘇浙之外，上海總會同馬車會都係唔少鍾意食中菜嘅金融企業老闆同高層嘅中環飯堂。要成為呢啲會所嘅會員話易唔易，話難唔難，要搵到會所董事會成員推薦，交入會費同年費就得。
蘇浙榮譽會員包括有前特首董建華同邵逸夫爵士等上海巨頭，前任政務司司長陳方安生都不時幫襯，前幾年樂壇天后鄭秀文慶祝36歲牛一，佢班港福堂教友，就係喺蘇浙同Sammi賀壽，前財爺梁錦松同夫人伏明霞、羅霖夫婦、前新聞之花葉雅媛等等都有出現。呢啲咪係身份象徵囉！