人真係唔好貪心，明明已經賺晒，但係順開就想要更多，結果呢，意大利入決賽喎，超標喇，但最後卻好似係大輸家咁。
以往喺旺角場睇完波，臨出閘走人前，球迷們總要睇睇嗰塊黑板上嘅手寫白字先安樂，上面寫住嘅係當日入場嘅數字，100又好，1,000又好，睇吓有幾多同路人，有種youwillneverwalkalone嘅感覺，7月1日港島區有着同一個氣氛陪着你走，而同一日嘅晚上，亦有主流嘅球迷（數目應該遠多於40萬）係支持意大利嘅，只係用咗短短3個星期嘅五場波時間，意大利就征服咗球迷嘅心。原本係橫掃球壇嘅西班牙，卻因為一兩場疑似悶波，就被球迷們嫌棄，宜不得佢死，搞到最後西班牙大勝4:0收科，仍然有唔少人認為西班牙，真好運。
西班牙冧莊，其實係熱門結局，不過多得巴洛迪利，為今屆EURO定下新視野，咁易俾你估到，就唔係巴神啦！巴神唔係最佳個位，但就係最為人傳誦嘅一位，你話我儍，我就入波；你諗住我入波，我又可以變番儍，呢啲咁影藝界嘅特質，幫到意大利，下季會益埋曼城，人氣隨時勁過成隊曼聯。
意軍定下新視野，西班牙亦改寫遊戲規則，第一隊冧莊固然令歷史學家收口，最叫人吹漲嘅係邊個話「裝假九」就入唔到波，4-6-0陣話無前鋒啫，啲球員有腳㗎嘛，咪一樣係咁埋門，決賽前迪保斯基話要出3個前鋒，就係幽你一默，所謂陣式其實都係死物，最笑唔出嘅，當然係一眾所謂前鋒，尤其是係冇出過場嘅洛蘭迪。
可以的話，迪保斯基隨時會提議大會取消埋最佳球員同神射手獎項，所謂最佳，其實概念就正正係同狂牛嘅集體負責制背道而馳，沒有最好，只有比對手好，你話今屆最佳球員一定要畀冠軍隊的話，我諗個個西班牙球員都有機會，包括後備冇上陣嘅門將連拿，據講佢係隊中嘅笑彈，擅長搞氣氛同打氣，好有用喎。本來決賽如果意大利多啲射門的話，卡斯拿斯攞都勉強合理，但結果係拍烏蠅多，卡斯拿斯比賽途中心諗：「射我啦，點解唔射我呀？」
另一個可以唔要嘅獎項就係神射手，又係違反晒迪保斯基嘅諗法，「神咩射啫，個個都入到波㗎啦！」事實證明迪保斯基係對的，費托臨完場射門一刻嘅人生交叉點，佢唔獨食，決定撥橫益吓桑馬達，咁咪就係最高境界囉！你入即係我入，winwin！又搞鬼喎，因為呢球助攻有分數，歐洲足協都係要將個金靴獎座交到費托手上。
還有更奇怪的事嗎？意大利唔悶、費托係神射手、巴神無攞紅牌，都話2012年係有啲古怪啦！好彩仲有英格蘭喺度話我哋知，世界其實冇變到，12碼照舊冇料到，這就是我的EURO。
Keyman
now節目主持
