經過6場激戰，西班牙終於再將歐國盃冠軍帶返屋企，周一狂牛兵團大軍回國後，隨即喺首都馬德里進行連串慶祝活動，包括到皇宮覲見國王卡洛斯；然後坐開篷巴士，由皇宮出發，穿梭市中心，然後到達豐收女神廣場，同超過10萬球迷一同進行盛大嘅祝捷會；大會指定MC連拿（Reina）又發偉論，盡寸各位隊友，High爆全場！
兩年前世界盃冠軍祝捷會，連拿又係大會司儀，當時佢就夾埋佩奧爾、恩尼斯達等新舊巴塞兵，將件巴塞波衫笠落當時仲效力阿仙奴嘅法比加斯身上，搞到法比仔好尷尬，時至今日，法比仔亦都如願回巢巴塞。今次祝捷會，利物浦門將連拿就冇再笠衫，不過就繼續妙語連珠咁搞氣氛，仲攞一啲隊友特徵嚟取笑，好似後衞艾比奧爾，因為面長長就畀連拿笑似香腸，大衛施華人仔細細又頭髮長長，連拿就笑佢似小野馬。
「碧基係花花公子」
連拿大膽起上嚟，都爆出唔少忌諱，好似寸碧基係花花公子；其實自從碧基同歌星Shakira拍拖，就一直被傳媒批評佢開始懶散，甚至傳出前巴塞教練哥迪奧拿想雪藏佢嘅消息。
另外，對於西班牙另一門將域陀華迪斯（VV），當年就因為VV冒起，搞到連拿被賣至利物浦，兩人一向被傳不和，不過今次連拿就大膽咁對VV講：「我愛你，我哋關係『他媽的』好。」
當然連拿唔係全部人都踩，好似讚左閘佐迪艾巴似電單車咁快，隊長兼一號門將卡斯拿斯，就讚佢係西班牙傳奇，仲有好多嘢要跟卡斯學習。最後一眾隊友High到爆，想抱起連拿㖭！
西班牙大軍名利雙收，不過佢哋都冇畀勝利冲昏頭腦，仲好樂於助人㖭；上周西班牙華倫西亞就發生森林大火，二千幾人被迫遷離家園，歐國盃金球獎得主恩尼斯達，同前華倫球員艾比奧爾，就決定各捐30萬歐元（約290萬港元）獎金，畀一班災民；好心有好報，西班牙衞冕世界盃都易啲！
連拿祝捷會寸盡隊友語錄（只列部份）
艾比奧爾─「我向大家介紹，我們2號係一條叫魯爾嘅香腸。」
碧基─「佢係西班牙隊嘅花花公子。」
費蘭度托利斯─「我喺國家隊嘅兄弟，歐國盃神射手，你真有膽識！」
域陀華迪斯─「我哋自小就認識，我愛你；雖然有人講我哋不和，不過我哋關係『他媽的』好。」
佐迪艾巴─「你好擔心我點形容你？你就似西班牙嘅電單車。」
大衛施華─「我唔想用小野馬嚟形容你，不過你真係好似。」
