商台長壽廣播劇《十八樓C座》邁向45周年，商台CEO陳志雲邀請咗一班藝人好友客串聲演，噚日仲喺商台搞記招，聲演《十》劇周記冰室老闆嘅金剛同一班播音員現身，黎耀祥、林建明、宣萱同傅穎等都有出席。而影帝黃秋生前日已率先錄音，商台稍後亦會邀請政界人士同歌手參與。噚日志雲喺現場招呼嘉賓，除咗餵漢堡包畀佢哋食，又同宣萱玩合巹交杯，好鬼風騷。
讚字正腔圓
祥仔否認係志雲邀請佢參與《十》劇，仲話係監製馮志豐邀請佢。記者笑祥仔連電台都撈埋，佢話：「好多嘢都做過，電台少啲，我都好有興趣做電台節目。有機會都想做關於演戲嘅節目，係可以傾吓，如果成事多份兼職都幾好。」志雲得知祥仔有興趣做電台即大表歡迎，仲話要搵祥仔慢慢傾，又讚祥仔字正腔圓，瓣瓣掂。
即將去台灣拍劇嘅傅穎近排積極減磅，家減咗十磅，佢話書展會出散文集，仲會教人點度過逆境。問傅穎會唔會送本書畀懷疑受情傷嘅好友何韻詩？佢話希望畀時間阿詩靜吓，提到阿詩自嘲孤獨終老，傅穎話：「講笑咋，佢不嬲都係咁鬼馬。」
