遊搜好行：達人帶路蒲澳門　嚐法式甜吻

最近澳門吹起一陣西式甜品風，幾間今年新開的甜品店都成為了當地人追捧的新貴，日日爆場，蛋糕幾乎做幾多賣幾多。今次我哋就搵來澳門火紅食家老陳教路，一齊試食新出法式TeaSet兼點評甜品新店。

記者、攝影：姚子浩
鳴謝：十六浦索菲特大酒店

澳門新晉飲食專欄作家，常「捐窿捐罅」搵食，曾為《澳門日報》、《品報》等多個媒體撰寫飲食文章，今年更為澳門飲食節目《老陳食通街》做主持，對食物深有研究。

■現在澳門最紅的食評人老陳（右），畀面應邀一齊試食這個酒店全新TeaSet，非常嘴刁的他都非常滿意，與甜品師傅Owen（左）一講起食經就雞啄唔斷呢！

作為電視美食節目主持人兼當地最紅的食評Blogger，老陳對於澳門有乜好嘢食可以話瞭如指掌，搵佢幫手試食新出的期間限定法式TeaSet，可以話係最佳人選。相約在十六浦索菲特大酒店的RendezvousLobbyLounge，要試的就是他們以「尼斯光影」為主題的法式甜品塔，甫上枱我哋都不約而同被其優雅的造型所吸引，Macaron、MadeleineCake、CremeBrulee等經典甜品樣樣齊，其中老陳率先試食的便是中間夾有士多啤梨及吉士的Macaron，「佢個外形同名牌PierreHerme好似，尤其吸引。食落上下層的半塊Macaron夠鬆化，Raspberry與吉士忌廉既微酸又香甜，很有水準。」老陳道。另外，他也覺得加入了八角的MadeleineCake和傳統口味非常不同，驚喜十足。最後隨餐附送的TeaForté也極之值得推介，上溫下冰的做法，上層是新鮮坐好的熱茶，自行倒進下層FlashChill，凍飲亦不失花茶的複雜香氣。

■TeaForté冰茶做法特別，以冰火陣泡茶，老陳話在澳門比較少有。

■這個TeaSet主打是法式風情，其中除了茴香酒心朱古力，當然少不了Macaron同Madeleine兩款經典甜品。

地址：澳門內港巴素打爾古街十六浦索菲特大酒店1樓
電話：（853）88617213

食過法式TeaSet，問老陳仲有邊度有靚甜品食，他便推介我們到才剛開了兩個月的CakezCafe。話這間新店隱世，原因係她位於就算連當地人都未必識去的「老饕巷」，根據今次嘅經驗，最直接就係由哪咤廟往下行，來到十字路口左轉。走了一輪終於到了CakezCafe，原來他們的三位合伙人都曾經係五星酒店的西餅師傅，現在做了老闆仍然100%親自落手做甜品，所以出品的水準有保證。望住餅櫃七八款西餅，有焦糖威廉梨蛋糕、栗子綠茶紅豆撻，又有百利甜酒朱古力蛋糕，件件都做到令人想試，一時之間真係無從入手。最後，因為老陳講過：「他們的拿破崙做得出色，酥皮厚而香脆鬆化，吉士忌廉甜美富蛋香，是五星級酒店餅房的水準。」所以便決定一試其虛實。果然，即點即做的招牌菜入口甜度剛好到位，又脆又香口，不消三數分鐘便可以把它KO。

■他們的其中一樣主打是即做甜品拿破崙，中間的自家製吉士又滑又香，值得推介！$54

■兩位老闆兼師傅Ken同Daniel都曾經在五星酒店做餅，因為大家都想有自己的甜品店，所以走埋一齊開了CakezCafe。

■這盞由Macaron堆成的枱燈非常可愛，幾乎現場的少女個個都舉機影相。

■CakezCafe的朱古力心太軟拿揑得非常好，流心做得極之出色，盡顯五星師傅功架。$60

地址：澳門哪咤廟斜巷（老饕巷交界）柏程苑地下
電話：（853）28355968

這一次去濠江的搵食之行，剛好撞正一個當地葡人的活動，一連兩日喺仁慈堂婆仔屋（瘋堂斜巷）附近搞Party，所以就順便去現場感受一下葡國氣氛。原來這個派對主要是慶祝一位葡國聖人的節日，居於澳門的葡國人包括廚師、精品店老闆等等都拋低工作，來到這裏開攤位做生意兼和同鄉狂歡。現場中間設有一個大舞台，由早到晚有人唱歌跳舞表演魔術，得台下一班葡國大人細路非常開心。而去這個Party的其中一個最重要收穫，就係可以食到多款他們自家製的葡式家常小食，當中有一款類似「葡式麥芽糖」的點心就非常別致，外形十足玩具一樣，不少小朋友都嚷着要食。

■喺大三巴黃屋仔開葡國餐廳的老闆都休店兩日，寧願去做小劇場吓班同鄉小朋友。

■成班葡國人聚埋一齊慶祝，吹水跳舞又有人扮貓王唱歌，場面非常熱鬧。

■當日有喺餐廳都未必食到嘅家常葡國小食，好像呢款「西式麥芽糖」的造型就非常可愛。

■小食店老闆Hugo本身係餐廳廚師，呢兩日就開檔賣葡國小食，勁熱情不停叫路人試食。

持香港身份證毋須簽證。

即日入住澳門十六浦索菲特大酒店高級客房，房價由$1,000起。查詢： http://www.sofitel.com

220V三扁腳插座

遊搜好行：達人帶路蒲澳門 嚐法式甜吻

遊搜好行：達人帶路蒲澳門　嚐法式甜吻