學唐唐競選辦主席李國寶話齋，僭建一呎都係錯！山頂嘉樂苑（圖）頂樓一位業主可能知道僭建真係好大鑊，所以佢想喺天台加建健身室，都拿拿聲向城規會申請。
嘉樂苑位於山頂馬己仙峽道，申請加建天台健身室嘅呢位業主，舊年以9988萬買入7樓A室連天台單位，單位面積2847平方呎，呎價3.5萬，認真富貴。「上上一手」業主都唔簡單，係華置（127）主席劉鑾雄前妻寶詠琴，寶詠琴過身後，個單位喺03年以2410萬賣畀上手業主。
加建樓梯健身室
新業主早兩個月向城規會申請，喺單位內加建一條直通天台嘅樓梯，再喺樓上起一個近240平方呎嘅健身室，要求城規會放寬高度限制。
聰明人其實都應該咁做啦，舊年傳媒陸續踢爆高官富豪屋企有僭建，唐唐同CY亦先後衰咗，2000呎同200呎都係僭建，政府部門照計嚟緊會加緊巡查，仲搞僭建？真係未煩過咩。