耀才證券（1428）一向高調，落本大賣廣告、推超平佣金搶客已經司空見慣，但今次因乜要為iBond（通脹掛鈎債券）搞慶功派對呢，要搞慶功嘅唔係政府咩，關耀才乜事呢，使唔使咁張揚呀！？
耀才主席葉茂林因為捐咗100萬畀CY競選特首，成為CY「八大金主」之一，耀才上星期宣佈要供股集資兩億之後，葉茂林就更加高調，又評論股樓，又解釋推平佣金唔係同行家爭生意云云。呢個星期五佢仲喺自己私人開嘅中環的士高MagnumClub搞iBond慶功派對，唔通要慶祝成功搶到3000個iBond新客？
高調皆因供股
華華思疑，葉老闆最近咁高調，可能同供股計劃有關，耀才前年先上市，集資兩億九，招股價1.6元，噚日收市報0.61元，即係潛水62%，供股價0.55元，好似好抵，但小股東願唔願意供股嚟溝貨呢？真係天曉得，難怪葉老闆得閒就要出嚟講吓公司前景、市況咁啦。