恒大地產（3333）早排俾研究機構Citron用57頁紙唱衰，指公司資不抵債，恒大股價單日唔見咗11%。就算近排內房股炒到㷫烚烚，恒大都只係原地踏步，返家鄉之路同香港普選條路一樣咁長。
之不過咁，一向見衰唱衰嘅外資大行，非但未有踩多兩腳，仲不斷出報告護航，好似有內房淡友之稱嘅瑞信，喺12日之內，就連出兩份報告力撐。
第一份就係出事嗰日、即係上個月22號出嘅，話恒大6月同7月嘅銷售靚仔，叫大家趁低吸納；噚日新鮮滾熱辣嗰份，就話公司新盤銷情好，回購行動持續有利股價，報告仲有埋恒大新盤嘅相，慌死大家唔信佢有樓喺度。但報告同場加映唱淡大陸樓市，話有中期風險。咁即係點呀，唔通恒大同大陸樓市decoupled？