不少人批評左丁山市儈，成日講經濟效益，講回報，講錢。實際上，有錢不是萬能，無錢則萬萬不能。英國「每日電訊報」派記者扮外國學生，揭發一間「金矢諮詢公司」北京辦公室可以安排成績唔算好嘅中國學生入Cardiff與Sussex大學，手續費由一千二百鎊至二千鎊不等，呢兩間大學幾有名氣，不過有名無利，教授咪要炒魷魚？收多啲中國學生可以幫補吓學校財政，彌補吓英國政府大削大學撥款吖嗎！
澳洲就唔同，經濟比較興旺，政府大把錢，IHT（六月二十五日）有詳細報道澳洲政府大力撥款俾大學，資助來自較貧困地區嘅窮學生到生活費昂貴嘅城市（如雪梨）讀大學，目的係到了2020年，將25至34歲嘅大學生比例提高至40%（去年係35%），以維持國家之總體競爭力。唔，梁特首，吳局長，可唔可以向澳洲學習？
日前有機構調查本港Y世代（80後）Z世代（90後）青年人嘅工作態度與適應能力，發現不少人缺乏社會適應力，缺乏批判性思考，工作態度與責任感不強，呼籲各方面幫助改善之，以免影響香港之競爭力。
唔駛調查，我地日常會見到呢啲狀況，好多僱主都有較強烈印象，啲年青人點睇？肥仔K算係80後，不過佢老闆都讚佢工作勤力，夠晒搏命，經常知返工不知放工。最近肥仔K頻頻有街外、街頭推廣活動，需要臨時工幫手，佢嘅經驗如何呢？肥仔K話：「你成日講女仔讀書叻過男仔，中文大學將來會成為中文女子大學，原來做嘢都係香港女仔搏命啲。搵咗一班男女大專生到貨倉開工，吃過午飯後，成班男仔話下午有節目，一哄而散，我只係勸到三位女仔肯在下午繼續開工。上日去機場做，諗住男仔啱啲，但打咗一輪電話，話明出五十蚊一小時，都搵唔夠男仔，最後又係以女大學生為主力。香港Z世代男仔，大概唔慣辛苦唔肯捱。」佢又講咗一個小故事，一間直資名校有學生犯規，學校要罰佢留堂，點知收到學生媽咪電話：「我個仔今晚唔可以留堂㗎，佢約好咗大提琴老師學琴，幾百蚊一個鐘頭，不如預先約定下個星期一先至留佢堂啦！」連留堂都要預約，一啲媽咪真係確保佢地嘅愛兒將來在社會缺乏競爭力與適應力！