【天國漫行之姊妹情深】羅慧娟日前病逝，一路上，娟妹並不孤單，既有好丈夫劉志敏及家人相伴，更有好姊妹黎美嫻和陳法蓉（Monica）送她最後一程。Monica昨趕抵新加坡出席娟妹喪禮，大讚娟妹堅強對抗病魔。不過談到娟妹生前點滴，Monica一度傷痛落淚。而娟妹母親昨晚抵達靈堂時神情哀傷，要親友攙扶。
《新加坡直擊》
羅慧娟兩年前不幸患上胰臟癌，上周六病逝於新加坡寓所，終年46歲。其家人前日在新加坡GraceHall為她一連多日設靈，明日上午出殯。身為娟妹好姊妹的黎美嫻，前日已抵達新加坡，而羅媽媽與娟妹另一好姊妹陳法蓉，昨日亦抵達新加坡。羅媽媽昨日傍晚在一女親友攙扶下抵達靈堂，神情哀傷。
「好唔捨得好難過」
至於一身黑色素服的Monica昨午現身靈堂，雖然她戴上墨鏡，但難掩傷痛，她接受訪問時說：「好唔捨得佢，但我好有信心天家再見。雖然我已經有心理準備，但仍然好難過。佢喺我心目中係個好樂觀嘅人，有呢個病之後，佢好勇敢面對，打贏一次又一次。」娟妹有何遺願？Monica說：「佢最希望身邊每一個人都信主，佢唔只一次講過話冇遺憾，我相信阿娟會有一個好美麗嘅人生。」娟妹月前拍下一段向親友告別的短片，Monica表示自己當時也在場，惟因自己眼淺所以未有出鏡，她說：「段片拍咗好多好多，但只係出咗一部份，因為導演話太hardsell，娟妹成日話要信主信主。」
Monica續說：「我、娟妹、黎美嫻同新加坡演員陳麗貞四個感情好好，早一段時間娟妹喺新加坡休養，我哋都有陪佢行街食嘢，過咗一段好開心時間。」說話至此，Monica已忍不住飲泣。
「幫佢改名羅慧堅」
對於娟妹一直低調處理病情，Monica解釋：「佢唔希望老人家同長輩擔心同唔開心，本來我收到阿娟消息之後，有諗過噚晚唔去朋友嘅婚禮，但嗰個又係好好嘅朋友。呢個世界好多悲歡離合，希望大家珍惜家，珍惜身邊每一個人。」談到跟娟妹的友情，Monica說緣自當年拍無綫劇《人在邊緣》，她說：「我係一個孤僻內向嘅人，有次我開工，娟妹車住我係咁喺灣仔兜圈，要我講心中一件秘密，如果唔係唔俾我走，跟住我哋傾咗好耐。」
昨日Monica往新加坡前接受商台電話訪問，也提及娟妹點滴。她指之前不時飛到新加坡陪娟妹，對上一次見娟妹為上月，Monica說：「娟妹病情一路反反覆覆，有時好精靈，有時好攰。」娟妹患病這兩年以來情況怎樣？Monica說：「佢冇對朋友隱瞞，用最後時間嚟傳道，呢段時間我哋幫佢改名叫『羅慧堅』，佢真係好堅，一關贏完又一關，好樂觀勇敢面對。」
當主持問有否跟娟妹丈夫劉志敏聯絡時，Monica忍不住嗚咽說：「我同劉生好熟，我有打去安慰佢，同埋想喺度再多謝佢一次，佢照顧得娟妹好好。」Monica指劉志敏為人十分低調，所以當她看到對方接受傳媒訪問時也感到十分驚訝。Monica指娟妹將兩繼子視為己出，很疼錫他們，當日次子劉鎮榮在婚禮上多謝娟妹，令娟妹十分感動。
雯女：想你便看天
鄧萃雯跟羅慧娟感情十分要好，早前她還專程到新加坡探望娟妹，可惜雯女現身在橫店趕拍無綫劇《金枝慾孽（貳）》，未能趕赴新加坡出席娟妹明日的喪禮。雯女助手昨說：「雯女希望盡快收工，因為一路拍緊嘢，完全冇機會出到嚟，佢話希望趕到返香港出席今個月12號嘅追思會。」
雯女昨在微博上載與娟妹的合照，並說：「那美好的仗她已經打過了，當跑的路她已經跑盡了，所信的道她已經守住了。因主耶穌比我們更愛她，她的離開只是暫時的，我們天家會再見！她一生的勞碌疾苦也終結了，現在安息了，在主的懷裏可做個無憂可愛的小孩子了！她是我永遠的羅天使！想你便看天……」此外，羅霖與丈夫劉坤銘昨日也到靈堂致祭。採訪、攝影：楊浩賢、李志明
