喺武俠小說入面有「南帝北丐」同埋「北喬峰、南慕容」，而喺球壇一樣有南乜乜同北乜乜；之唔係「北神州、南森巴」囉。以前啲臨近退休嘅球星多數去日本、中東或美國，但家就轉咗地點，北上大陸或南下巴西。無他嘅，中國同巴西都屬「金磚五國」，錢途無限，唔係施多夫同簡路迪點會揀去巴甲同中超呢？
巴西雖係足球強國，但巴甲從來係有出冇入，冇乜球星會嚟；而中國就因為水準低，所以佢哋個聯賽亦吸引唔到球星。不過時代唔同，巴西同中國經濟起飛，自自然然吸引到球星嚟搵食。就好似36歲嘅荷蘭中場施多夫咁，上周六同巴甲保地花高簽咗兩年合約。保地花高會長梅利斯奧阿辛卡奧咁講：「施多夫係保地花高史上，簽入嘅最偉大外援。佢嚟唔係為錢，而係要接受新挑戰，可以喺巴甲呢個高水平聯賽打多兩年。」
但我求大俠就唔係咁諗嘞，聽講施多夫嘅年薪有成186萬歐元（約2,270萬港元）；對一個已步入黃昏期嘅球星嚟講，條件算係好好。山長水遠去巴西踢波，唔通真係為咗接受挑戰咩！至於施多夫嘅前AC米蘭隊友恩沙基，都有機會去巴甲。據聞有幾間中超同巴甲球會都對恩沙基有興趣，但呢個38歲意大利前鋒應會去巴西簽華斯高。
馬隆達卡卡陸逐有來
恩沙基揀巴甲都正路，一來有施多夫呢個伴，二來人工唔錯。華斯高同時亦斟緊車路士嘅32歲法國中場馬隆達，據報仲開到450萬歐元畀佢。雖則恩沙基年紀大一截，但聽聞年薪都叫到成200萬歐元。
巴甲係咁搵老牌球星，中超當然唔執輸啦。34歲嘅馬里前鋒簡路迪就落實加盟北京國安，簽約一年半，年薪聽講有成160萬歐元；而佢成為法國前鋒安歷卡同埋科特迪瓦前鋒杜奧巴後，中超史上第3個頂級外援。查實中超比巴甲球會更進取，連當打嘅球星都想簽。有傳廣州恒大就開咗份3年1,800萬歐元另加每年400萬歐元獎金嘅合約畀皇馬嘅巴西中場卡卡，搞到卡卡心大心細。咁又係，如果卡卡去中超踢波，就唔使旨意入選巴西踢2014年世盃。
