中旅（308）既係現金牛，PB又吸引，有得諗。中旅現價1.43元，同最近八年低位，唔係相差好遠，相對NAV2.3元折讓38%，喺07年中資股熱炒期，中旅無折讓，PB兼上到兩倍水位。再講，中旅手頭淨現金近27億銀，係超級現金牛，再風大雨大，中旅都頂得順。又中旅經過09同2010年度（12月底止）大額折舊期呢項成本增加影響，加埋就部份經營欠理想嘅項目投資撇晒賬，執到靚靚仔仔，2011年度純利，就彈番上6億銀樓上。而集團主打酒店業，呢期應該Keep住穩步增長，喺中線進一步享受祖國旅遊業務爆升期前，已經可以支持到2012年度業績，純利係咁意增15%到近8億銀，PE得10倍。中旅現價翻半番到2.15元，預期PE不過15倍，唔係貴。
資本策略博升20%
資本策略（497）貼近半年高位，等破位，。資策2011年度（3月底止）出售投資性物業大豐收，資產值大幅增加17億銀，每股NAV上到0.72元，現價（0.34元）折讓52.7%，而集團淨借貸比率4%都唔夠，穩陣到爆。呢轉吼實0.31元個位，資策若果後抽，喺呢個位兜轉，博升20%到0.37元，PB未有耐上到一倍。
錢雋