最近PSVita玩家，打高達打到天昏地暗，但亦不要錯過即將推出的大作，尤其係下半年推出的《小小大星球》，藝員陳茵媺試玩過都讚不絕口，「公仔可愛，創意十足！」而蒙嘉慧就愛玩《Dokuro》，除了可愛畫風外，仲要食腦過關。又多兩個明星藝人變機迷，玩吓手喺PSV個Near內，有機會撞到佢哋喎！
記者：許福合
攝影：楊錦文
Aimee有Say
愛音樂及跳舞的陳茵媺，對動作遊戲特別偏愛，雖屬新手上陣，但見佢控制Sackboy篤篤下話咁快完成一關，頗有打機天份。「主角好可愛，篤芒過關玩法好有創意。以後拍劇等埋位，都可用嚟消磨時間。」
Aimee讚主角夠Cute
PS暑假宣傳第一炮，就係力谷白色PSV推出，更搵嚟「豪嫂」陳茵媺同「麪嫂」蒙嘉慧撐場，搞到灣仔電腦城仲逼過$1電腦節。現場當然唔少得試玩PSV王牌「清泉Game」《小小大星球》，以及《Dokuro》等新作品。
與PS3版玩法相似，主要靠眼明手快抓取、跳躍過關，PSV版更可利用前後觸屏特色，例如遇到障礙物時，篤吓場景發光位置，便可能出現箱子或彈弓等過關物品；有時還可傾斜機身，幫助Sackboy越過障礙。遊戲還具備創造功能，可創作關卡與PSN社群分享，亦可利用Near功能，挑戰附近玩家在特定關卡的分數。朋友們一起，又可四人連線遊戲，部份迷你遊戲還可一機雙打，夠晒特別！
YoYo畫線救公主
另一款《Dokuro》將在本周推出，別看畫面黑黑暗暗，靚女蒙嘉慧玩起來都非常肉緊，雖然古仔係救公主咁例牌，不過講魔王逼婚，令YoYo玩起嚟零舍肉緊投入。主角不是王子，而是骷髏人Dokuro，玩家要控制佢幫公主避開陷阱前進。過程中，要使用觸屏引發Dokuro超能力，利用粉筆畫出橋、火燄及水，幫公主逃出生天。《Dokuro》已有體驗版下載，YoYo都話要下載試玩，仲漏口風自爆，原來伊健都有用她的SEN賬號Download遊戲，唔通係共用賬號？聽落又幾Sweet喎！
