歐國盃打到去決賽階段，冠軍唔係西班牙就係意大利，7月1日終極之戰就有分曉；不過神射手嘅爭奪就一啲都唔簡單，巴神準決賽入兩球加入戰團，大大話話6、7名球員仲有得爭，真係亂過戰國七雄。
歐洲足協同足智彩嘅歐國盃神射手計法唔同，歐洲足協就計埋助攻，不過足智彩就單計入球；巴洛迪利已經有3個入球，係決賽兩軍陣容中累積入球最多嘅球員，難怪足智彩噚日諗咗成個晏晝，晚上重開盤口，將佢列成2.15倍大熱門。巴神賠率熱到透，但我求大俠就覺得除非你分組賽第2場後冷到200倍，或者對德國前50倍時入手，否則就唔好追嘞。
巴神隨時同「其他」對分
事關足智彩條例列明，如果超過一名球員平頭勝出，中咗嘅投注金額將按平頭勝出人數分為相同數目的等份，然後乘番投注時賠率。如果巴神決賽冇波入，咁就至少要同累積3個入球嘅馬里奧高美斯、C朗同「其他」對分，即係投注一百蚊，只收番$53.8，中咗都要輸錢。
費托有大賽命值冷敲
但手痕又想玩吓神射手嘅波友，又可以點做？因為歐國盃不設季軍戰，4強止步嘅德國同葡萄牙已經冇比賽，即係話馬里奧高美斯同C朗家只係「等死」feel，又一定要同人對分，真係唔值博。相反「其他」就算係進可攻退可守；事關「其他」入面，文迪蘇傑同迪沙高耶夫都有3個入球，巴神冇波入，「其他」都有機會分錢。萬一法比加斯梅開二度，加上巴神交白卷，直頭好大機會獨中㖭。
如果嫌「其他」只得4.2倍太熱，西班牙嘅費蘭度托利斯（費托）都係好選擇。費托有兩球在手，而且佢都有大賽命，上屆決賽就靠佢一箭定江山幫西班牙捧盃；準決賽迪保斯基以尼格度打正選，廢到無倫，點都要畀番次機會費托上場，冷冷地有22倍，小注博一博都好。